बागमति प्रदेश सरकार संकटय्, नेकपा एसया अडान यथावत

येँ (नेपालभाषा टाइम्स)÷ प्रदेश सरकार भागबन्डाया निंतिं म्हिगः प्रधानमन्त्री निवास बालुवाटारय् च्वंगु सत्ता गठबन्धनया शीर्ष नेतातय् बैठक छुं निष्कर्ष पिमकासे क्वचाःगु दु । बैठकय् एकीकृत समाजवादीया अध्यक्ष माधव नेपालं माओवादी व एमालें थःगु पार्टीयात सत्ताय् वनेगु निंतिं स्वाहाने दयेकूगु धासें यथास्थितिइ ग्वाहालि यायेमफइगु अडान कायेवं बैठक अनिर्णित जूगु खः ।

बैठकय् नेपालं न्हय्गू प्रदेश मध्ये छगुलिइ नेतृत्व बीमाःगु, फुक्कं राजनीतिक नियुक्तिइ सम्मानजनक भागबण्डा जुइमाःगु व थःत बाइपास यानाः थ्व स्वयां न्ह्यः याःगु निर्णय प्रति पश्चाताप यायेमाःगु अडान काःगु खः ।

बैठकय् बागमती प्रदेशय् विश्वासया मत बीत प्रधानमन्त्री पुष्पमकल दाहाल व एमालेया अध्यक्ष केपी शर्मा ओलीं नेपालयात इनाप याःगु खः । तर नेपालं बागमतीइ जक मखुसे फुक्कं थासय् नेकपा एसया पोजिशन क्लियर जुइमाःगु अडान काःगु खः ।

शीर्ष नेतातय् बैठक छुं हे निष्कर्ष पिमकासें क्वचायेवं थौं विश्वासया मत कायेगु तयारी यानाच्वंगु बागमती प्रदेशया मुख्यमन्त्री शालिकराम जमकट्टेलयात मछिंगु अवस्थाय् लाःगु दु । थौं तक नेकपा एसलिसे सहमति मजुल धाःसा बागमती प्रदेशया लिसें मेमेगु प्रदेशया सरकार नं प्रभावित जुइ ।

थुकिया दथुइ नेकपा एसया प्रदेश संसदीय दलया बैठकं नं यथास्थितिइ मुख्यमन्त्री जम्मकट्टेलयात विश्वासया मत मबीगु निर्णय याःगु दु । दलया नेता कृष्णप्रसाद खनालं न्यागू दलीय गठबन्धन राजनीतिक गठबन्धन मजूगु धासें आःया अवस्थाय् मुख्यमन्त्रीयात विश्वासया मत मबीगु खँ धाःगु दु ।

थ्व स्वयां न्ह्यः बागमतीया मुख्यमन्त्री जम्मकट्टेलं थःगु सरकार बचे यायेगु नितिं हाम्रो नेपाली पार्टीया शैलेन्द्रमान बज्रचार्ययात मन्त्री दयेकूगु खः । बज्राचार्ययात मन्त्री दयेके न्ह्यः च्वंगु न्यागू दलं जारी याःगु न्यागू बुँदे सम्झौता यायेगु झ्वलय् धाःसा नेकपा एसं नं हस्ताक्षर याःगु खः । न्यागू बुँदे सहमतिइ प्रदेशया कृषि तथा पशुपंछी विकास मन्त्री डा. राजेन्द्रमान श्रेष्ठं हस्ताक्षर याःगु खः । दलया नेताया स्वीकृति मकासें श्रेष्ठं हस्ताक्षर याःगु खँय् नं पार्टीं न्यनेकने याःगु दु । वयां लिपा डा. श्रेष्ठं थःपाखें गल्ती जूगु धासें क्षमा फ्वंगु खः ।