स्थानीयं लँ पना बीवं फोहोर वायेगु बन्द

येँ – स्वनिगःया फोहोर वायेत छ्यलीगु पासाङल्हामु राजमार्ग दयेकेगु ज्या लिबाकूगु धासें स्थानीय जनतां लँ हे बन्द याना बीवं स्वनिगःया फोहोर वायेगुज्या बन्द जूगु दु । अन लँ जूगु कारणं वंगु आइतवाःनिसें येँय् फोहोर द्वँचिनेगु शुरु जूगु खः ।

स्थानीय वासिन्दातय्सं सतक दयेकेगु ज्या ठेकदार कम्पनीं लिबाकूगुलिं बाध्य जुयाः लँ बन्द यायेमाःगु खँ धाःगु दु । स्थानीयवासीं उगु लँय् वये–वने याइगु फुक्क हे सवारी साधन पना बिउगु खः । तर थुकिं यानाः स्वनिगःया फोहोर संकलनया ज्या नापं प्रभावित जूगु दु । सिसडोल वनेगु लँपुया मुड्खु–तीनपिप्ले सतक खण्डय् स्थानीय वासिन्दां पंगः थनेवं फोहोर वायेगु ज्या प्रभावित जूगु दु ।

थ्वहे झ्वलय् येँ महानगरपालिकाया प्रमुख विद्यासुन्दर शाक्यं इलय् हे लँ दयेकाः फोहोर वायेगु ज्या सुचारु यायेत संघीय सरकारयात इनाप यानादीगु दु । संघीय सरकारं लँ दयेकेगु ज्याय् ध्यान मबिउगु कारणं यानाः येँय् फोहोरया समस्या शुरु जूगु खँ नं वय्कलं धयादीगु दु । संघीय सरकारं लँ दयेकेत पहल मयाःगु कारणं यानाः राजधानीया जनतां मार फये मालाच्वंगु खँ नं वय्कलं कनादीगु दु ।

लिसें मेयर शाक्यं स्वनिगःया फोहोर वायेत छ्यलेगु धकाः प्रस्तावित यानातःगु बञ्चरेडाँडाया ल्याण्डफिल साइट आः तक मदयेकूगु खँय् नं संघीय सरकारया आलोचना यानादीगु दु । यदि सरकारं उगु ल्याण्डफिल साइट इलय् हे दयेकाः ज्या पूवंकूसा फोहोर व्यवस्थापन यायेत अःपुइगु खँ वय्कलं कनादीगु दु ।

सम्बन्धित बुखँ

LEAVE YOUR COMMENTS