कमलाछीइ धः दयेकेत सांसद कोषपाखें ५० लाख

येँ – असन कमलाक्षी टोल सुधार समितिया साधारण सभा क्वचाःगु दु । साधारण सभां अमूल्य मानन्धरया अध्यक्षताय् न्हूगु कार्यसमिति नं ल्यःगु दु । येँ जिल्ला क्षेत्र नं. ६ या प्रतिनिधि सभा सांसद व पुलांम्ह रक्षामन्त्री भीमसेनदास प्रधान मू पाहाँ कथं झायादीगु ज्याझ्वलय् कमलाक्षी लागाय् खनेदुगु धःया दीर्घकालिन समस्या यंकेगु निंतिं सांसद विकास कोष पाखें ५० लाख तका विनियोजन याःगु जानकारी नं बिउगु खः ।

थ्व ज्या येँ महानगरपालिकापाखें कार्यान्वयन याकेगु सुधार समितिया उपाध्यक्ष प्रदीपकुमार जोन्छेया अध्यक्षताय् न्हय्म्ह दुजः दुगु मूल ढल सुधार उपभोक्ता समिति नं गठन याःगु जानकारी बिउगु खः ।

ज्याझ्वलय् न्हूगु कार्यसमितिया पदाधिकारीपिं उपाध्यक्ष प्रदीपकुमार जोन्छे, सचिव अधिवक्ता राजेन्द्र प्रसाद श्रेष्ठ, कोषाध्यक्ष सर्वज्ञरत्न तुलाधर, सदस्यपिं भैरवकाजी श्रेष्ठ, राधाकृष्ण नकर्मी, देवदत्त मानन्धर, दिपकसागर सिंह व चन्द्रमान सिंहपिंत पाहाँ येँ महानगरपालिका २७ वडाया अध्यक्ष चिनियाँमान वज्राचार्यं खादा न्ययेकाः सम्मान यानादीगु खः ।

अथेहे त्वाःया धार्मिक, साँस्कृतिक, सम्पदा संरक्षण व प्रवद्र्धनया लिसें त्वाःया विकासया निर्माणया ज्या अनवरत रुपं योगदान याना वयाच्वनादीपिं समितिया संस्थापक अध्यक्ष डिलचन्द्रानन्द वैद्य, पुलांम्ह अध्यक्ष उत्तमदास तुलाधर व समाजसेवी हिराबहादुर खड्गीयात मूपाहाँ प्रधानं उपहार व सम्मान पत्र लःल्हासें सम्मान यानादीगु खः ।