अवैध जूसां विदेशय् हे च्वने यः ,मलेशियाय् जक ६० द्वः अवैध नेपाःमि दुगु अनुमान

येँ – अवैध रुपं मलेशियाय् च्वनाच्वंपिं विदेशी ज्यामितय्त देय् त्वःताः पिहां वनेत अनया सरकारं बिउगु आममाफीया म्याद फुइधुंकुसां द्वलंद्वः नेपाःमि ज्यामित उकियात वेवास्ता यासें अन सुलाः सुलाः च्वनाच्वंगु खँ सीदुगु दु । थःगु देशय् च्वनाच्वंपिं अवैध ज्यामितय्त पितिना छ्वयेगु लागिं छुं ई न्ह्यः तिनि मलेशिया सरकारं छगू निश्चित ई तोके यासें उगु अवधिया दुने देश त्वःताः पिहां वंसां उपिं न्ह्याक्व हे अवधि अवैध रुपं च्वंगु जूसां छुं कारवाही मयायेगु घोषणा याःगु खः ।

थ्व अवधिया दुने छुं नेपाःमित मलेशिया त्वःताः स्वदेश लिहां वःसां मेपिं द्वलंद्वः नेपाःमित धाःसा उकियात नं अपहेलना यासें अन हे सुलाः सुलाः च्वनाच्वंगु खँ धाःगु दु । मलेशियास्थित नेपाःया राजदूतावासं गुलि नेपाःमित अथे च्वनाच्वंगु दु धइगु पाय्छि तथ्यांक मदुसां ५० निसें ६० हजार नेपाःमि अझ नं मलेशियाय् अवैध रुपं च्वनाच्वंगु दयेमाः धइगु अनुमान याःगु दु ।

थुपिं नेपाःमित थःत छुं समस्या जुल धाःसा जक दूतावासया सम्पर्कय् वइगु जूगुलिं थुमिगु बारे थःपिंसं छुं मसिउगु खँ नं धाःगु दु । खाडी लागाया थीथी देय्तय्सं नं थीथी इलय् थथे हे यानाः अवैध रुपं च्वनाच्वंपिं विदेशी ज्यामितय्त देश त्वःताः पिहां वनेगु अवसर बिउसां अधिकांश नेपाःमितय्सं धाःसा उकियात वेवास्ता याइगु खँ धाःगु दु ।

थ्व स्वयां न्ह्यः यूएई, कतार व साउदी अरेबियां बिउगु थज्याःगु अवसरयात नं अन च्वनाच्वंपिं आपालं नेपाःमितय्सं वेवस्ता याःगु खः । थज्याःपिं नेपाःमित छुं कथंया दुर्घटनाय् लात धाःसा वा विरामी जुल धाःसा छुं कथं प्रहरीया ल्हातय् लात धाःसा कडा सजायँया भागी जुइमालीगु खँ धाःगु दु । नेपालय् थःपिंसं कयातःगु त्यासा तक पुले सिमधइगु, ध्यबा कमे याये मगाइगु आदि कारणं यानाः नेपाःमित अवैध रुपं जूसां अन च्वंच्वनीगु खः ।

मलेशियालिसे सम्झौता तयारी
थ्वहे झ्वलय् नेपाः सरकारं मलेशिया सरकारलिसे नं थःपिनि ज्यामि छ्वया हयेगु बारे सरकारी तहया सम्झौता याइगु जूगु दु । उकिया लागिं सम्झौताया मस्यौदा तयार जुयाच्वंगु दु । मलेशियाय् लखौं नेपाःमि ज्यामित वनाच्वंगु दुसां निगू देय् दथुइ औपचारिक सम्झौता धाःसा जूगु मदुनि ।

औपचारिक सम्झौता मजूगु कारणं वंगु खुला न्ह्यवंनिसें नेपालं थः ज्यामितय्त मलेशियाय् मछ्वसे पना तःगु खः । मलेशिया वनेमाःपिं नेपाःति थन हे थाःगु कारणं यानाः राजश्वय् लय् ६० करोड तका बराबरया रेमिटेन्स दुहां वयेगु कम जूगु खँ नं धाःगु दु । नापं द्वलंद्वः नेपाःमित नं थन हे थानाच्वंगु दु ।