स्थापना दिवसय् पूर्व पदाधिकारी सम्मान

येँ – नेपाल पत्रकार महासंघं थ्व हे वइगु चैत १६ गते थःगु ६४ क्वःगु स्थापना दिवस हनीगु जूगु दु । महासंघं मौलिक व रचनात्मक यानाः थीथी ज्याझ्वः यासें देय्न्यंकं व देशं पिने दक्वं प्रदेश, शाखा, एशोसियट समितियात स्थापना दिवस हनेत निर्देशन बिउगु दु । स्थापना दिवसया लसताय् महासंघया पुलांपिं पदाधिकारीया सम्मान, शाखा सम्मानलिसें जोखिम, संकट व कठिन अवस्थाय् रिपोर्टिङया अनुभव प्रस्तुतीकरण, थीथी कासा याइगु जूगु दु ।

नापं पुलांपिं अध्यक्ष व सभापतिलिसे अन्तरसंवाद मैत्रीपूर्ण फुटसल, निःशुल्क स्वास्थ्य शिविर लगायतया ज्याझ्वः नं याइगु जूगु दु ।
थ्व हे झ्वलय् महासंघं थःगु ६४ क्वःगु स्थापना दिवसया लसताय् महासंघया नीम्ह पुलांपिं उपसभापति, उपाध्यक्ष, महासचिव पदय् च्वनाः ज्या याये धुंकूपिं पदाधिकारीयात सम्मान याइगु जूगु दु ।

महासंघ जुइधुंकाः उगु पदय् च्वनाः विशिष्ट योगदान बियादीपिं पदाधिकारीपिंत सम्मान यायेत्यंगु खः । चैत १६ गते कुन्हु जुइगु विशेष ज्याझ्वलय् वय्कःपिंत सम्मान यायेगु महासंघया सचिव रामप्रसाद दाहालं कनादिल । महासंघं चैत १३ निसें १६ गते तक देय्न्यंकं प्यन्हुतक स्थापना दिवस न्यायेकीगु जूगु दु ।