ने. सं. ११४४ कछलागा षष्ठी -

थज्याःगु नं फैसला !

अदालतया ज्या धइगु न्याय बीगु खः । पीडितयात न्यास व पीडकयात सजाय बीगु हे अदालतया मुख्य ज्या वा धर्म खः । अदालतं गुगु आदेश व फैसला न्यंकी व छगू कथंया अन्तिम जुइ । उकियात पूरा यायेगु अभियुक्त वा दोषी ठहर जूपिनिगु कर्तव्य नं जुइ । अदालतं म्वाःमदुगु खँय् थःगु ई खर्च याइमखु धइगु मान्यता दु ।

तर गबलें गबलें अदालतया आदेश नं तसकं अजू चायापुगु जुइयः । भारतया सर्वोच्च अदालतं आः नकतिनि छगू अज्याःगु हे अजू चायापुगु आदेश बिउगु दु । उगु आदेश खः अदालतया हे छगू कुनय् च्वना च्वनेगु । भारतया सर्वोच्च अदालतं अनया केन्द्रीय शिक्षा बोर्डया पुलांम्ह अन्तरिम प्रमुख एम नागेश्वर राययात अदालतया छगू कुनय् न्हिछितक च्वना च्वनेगु फैसला न्यंकूगु खः ।

अदालतया अवहेलना याःगु द्वपनय् दोषी ठहर जूम्ह रावयात अदालतं उकथंया सजाय न्यंकूगु खःसा छगू लाख जरिवाना नं पुइकूगु दु ।
अदालतया अवहेलनाया द्वपनय् छन्हु न्ह्यः हे माफी फ्वंम्ह रावयात अदालतं थःगु फैसाल न्यंकाः हे त्वःतूगु खः । थ्व मामिलाय् रावलिसें वया कानूनी सल्लाहकारयात दोषी ठहर यानाः उकथंया हे सजाय न्यंकूगु खः ।

रावं थःत माफी बीत अदालतय् बिउगु निवेदन अस्वीकार यासें न्यायाधिशं अदालतया अवहेलना याःगुलिं धासें उगु फैसला न्यंकूगु खःसा उकिं यानाः रावया जागिरे जीवनय् हे संकटय् लाइगु अवस्था पिहां वःगु दु । घटनाकथं विहारया मुजफ्फरपुरया छगू मिसा आवास गृहया छगू घटनायात कयाः छानविन यानाच्वंम्ह अधिकारीयात अदालतया अनुमति मदयेकं हे बर्खास्त याःगु जुयाच्वन ।

थुगु मुद्दायात कयाः रावयात अदालतय् स्वयम थः हे उपस्थित जुयाः लिसः बीत आदेश बिउगु खः । अदालतय् उपस्थित जूम्ह रावयात अदालतं थःगु अवहेलना याःगु धासें वयात न्हिछियंकं अदालतया छगू कुनय् च्वना च्वनेत आदेश बिउगु खः ।