लिम्पियाधुरा झीगु हे खः

ताः ई न्ह्यःनिसें भारतीय सेना तयातःगु कारणं पश्चिम नेपाःया सिमा क्षेत्र लिम्पियाधुराय् नेपाःमित स्वतन्त्र रूपं जुयेगु, म्हितेगु व कृषि योग्य जमिन दुसां बुँ याना नयेगु वातावरण मदयाच्वंगु खः । महाकाली पारी नेपाः दु धइगु ल्वमंके कथं थीथी इलय् भारतं विवाद याइगु कारणं इलय् ब्यलय् लिपुलेक व लिम्पियाधुरा विवादय् लानाच्वंगु दु ।

महाकाली खुसिया उद्गमस्थान मामां वनेगु खःसां लिम्पियाधुरा नेपाःया खः । तर महाकाली पारी लाकातःगु कारणं उगु लिपुलेक व लिम्पियाधुरा बारे इलय् ब्यलय् नेपाः व भारतया दथुइ विवाद ब्वलनेगु याः । आः भारतं काश्मिरयात थःपिनि न्हूगु संविधानय् संशोधन यानाः उगु लागायात स्वायत्त प्रदेशपाखें बञ्चित यानाः थःपिनिगु हे अधीनस्थ जुइकथं नक्सा तयार यायेगु झ्वलय् भारतया न्हूगु नक्साय् नेपाःया भूभाग लिम्पियाधुरा व लिपुलेकयात नं भारतया हे भू भागय् तयातःगु नक्सा पित बिउगु दु ।

थ्व नेपाःया लागिं आपत्तिया खँ खः । लिम्पियाधुरा व लिपुलेकय् नेपाःमितय्गु जनगणना काःवंम्ह वरिष्ठ पत्रकार भैरव रिसाल ९१ दँया बैसय् आः नं म्वानाच्वंगु दनि । अथेहे अनया जग्गा जमिनया स्वामित्व स्वयेगु खःसां जिल्ला कैलाली व कञ्चनपुरया लागा कथं कायम जुयाच्वंगु दु । खँ थुलि हे जक खः कि मिलिजुलि सरकार वा अस्थायी सरकार जूगु इलय् टंकप्रसाद आचार्यया पालाय् भारतीय सेना अन च्वनेत वल ।

वयां लिपा अन थीथी कथंया भारतीय सेनाया थीथी गतिविधि अप्वयेका यंकल । वये वने याइपिंत भारतीय सेनां चेकजाँच यायेगु यानाहल ।
थ्व खँ सत्य खः । तर उगु थासं भारतीय सेना चीकेमाः धकाः नेपाःया राजनीतिक पार्टी व सरकारं तकं बारम्बार भारतीय पक्षयात इनाप, दबाव व अभियानत न्ह्याकेगु नापं कूटनीतिक पहल धाःसा मजूगु मखु, जू ।

उकियात तेरपुछ यायेगु ज्या भारतीय पक्षं यानाच्वंगु मदु । न्हापा न्हापा राजनीतिक पार्टी व कूटनीतिक ख्यलय् जक चर्चाय् वइगु थ्व लिम्पियाधुरा व लिपुलेकया विषयय् थुगुसी पत्रपत्रिकाय् सार्वजनिक रूपं बहस सुरु जूगु दु । थ्व भारतया भूमि मखु । बरु भारतीय सेना निर्वाध रूपं ताः ई न्ह्यःनिसें च्वना वयाच्वंगु खः धइगु धाःसा स्पष्ट जू ।

भारतीय सेना च्वनेवं वा वयात थाय् बियेवं उगु थाय् भारतीय भूमिया रुपय् दाबी यायेगु नं मिले मजू । उकिं थ्व मामला कूटनीतिक व राजनीतिक रुपं समाधान यायेमाःगु विषय जूगु दु । छगू इलय् भारतीय पक्षं नाकाबन्दी यानाः नेपाःयात मछिंगु अवस्था ब्वलंकूगु इलय् भारतीय सेना कालापानी छोड धकाः नारा बियाः राजदूतावास घेराऊ यायेगु ज्या जूगु खः ।

अतिक्रमण व आक्रमणया खँय् माहिर भारतीय पक्षं आः नं नेपाःया भूमि भारतीय पक्षं काल धाःगु मदुनि । सुम्क च्वनाः नक्साय् दर्ता याकाः उकियात राष्ट्र संघ मार्फत् मान्यता बिइकेगु कुटनीतिक चाल जक म्हितेत स्वयाच्वंगु खः ।

आः नं झी नेपाःमितय्गु स्वभिमानयात हाथ्या बीकथं भारतीय पक्षया न्हूगु दयेकूगु नक्साय् नेपाःया कालापानी क्षेत्र धयातःगु लिपुलेक व लिम्पियाधुरा भारतीय नक्साया दुने लाका तयार याःगु कारणं थ्व मामलाय् संयुक्त राष्ट्र संघया ग्वाहालि काये माःसां तबि नं थ्व खँय् नेपाः लिचिलेगु मिले हे मजू ।

सिमा अतिक्रमणया खँय् माहिर भारतं आः नं सलंसः द्वःलंद्व हेक्टर नेपाःया भूभाग त्यलाच्वंगु दु । सिमा स्तम्भ सारे यायेगु क्रम जारी हे जुयाच्वंगु दु । थज्याःगु अतिक्रमण व आक्रमणया खँय् माहिर भारतीय पक्षं आः नं नेपाःया भूमि भारतीय पक्षं काल धाःगु मदुनि । सुम्क च्वनाः नक्साय् दर्ता याकाः उकियात राष्ट्र संघ मार्फत् मान्यता बिइकेगु कुटनीतिक चाल जक म्हितेत स्वयाच्वंगु खः ।

तर भूमि आः थ्व इलय् वन धाःसा वन कि वन हे जुइफु । अथे जुयाः नं थ्व संबेदनशील अवस्थायात ध्यानय् तयाः सकल नेपाःमित सजग, सचेत व प्रतिरोधय् न्ह्यःने दँ वने फयेकेमाः । थ्वहे झ्वलय् बुधवाः नेमकिपां न्हापांखुसि कमलविनायकनिसें सूर्यविनायक तक बिशाल बिरोध प्रदर्शन यानाः नेपाली भूमियात हस्तक्षेप याःगु मोदीया फासीवादी चरित्र जूगु स्पष्ट याःगु दु ।

न्ह्यागु नं अन्तर्राष्ट्रिय मामलाय् न्ह्यलुवाःया भूमिका म्हिताच्वंगु व न्यय्न्यादँ न्ह्यः हे नेपाली भूभाग नवलपरासीइ भारतीय क्षेत्र कथं अतिक्रमण यायेत स्वःगु इलय् अन्तर्राष्ट्रिय मामलालय् जुलुस व सभा यानाः थःपिनि राष्ट्रप्रेम क्यनेत ताःलागु नेमकिपां थुगसी नं बिरोध सभा मार्फत् सकल नेपाःमितय्त सजग जुयाच्वनेत इनाप याःगु दु ।

भारतीय गृहमन्त्रालयं तयार याःगु राजनीतिक नक्साय् थुकथं नेपाःया भूभाग तकं भारतीय लालाय् लाकूगु बारे कार्तिक १८ गते थीथी पत्रपत्रिकां समाचार च्वयेवं थीथी राजनीतिक पार्टी व जनसाधारणय् चर्चा सुरु जूगु दु । थ्व इलय् यदि झीसं थःगु भूभागयात थःपिनिगु खः धकाः कायम याये मफुत धाःसा उकथं भारतं थःपिनिगु सेना तयाः कब्जा यानातःगु नेपाःया भूभाग लिपा थ्यंकं थःपिनिगु हे खः धकाः दावी यानाच्वनेफु ।

उकिं आः हे झी सकलें जानाः थ्व मामलाय् ध्यान तयाः न्ह्यचिलेमाःगु खनेदु । साधारण मिखां अःपुक खनेदुगु थ्व चीजयात आः चिउताः तये फत धाःसा म्हिगःनिसें थःपिनिथें यानातःगु थाय् बाध्य जुयाः त्वता बीत स्वइ । मखुत धाःसा म्हिगः सेनाया भरय् जक कब्जा यानातःगु उगु थाय् लिपा कानूनी रुपं हे थःपिनिगु खः धायेत नं भारतीय पक्ष लिचिलि मखु ।

भारतया संविधानया धारा ३७० व ३५ (क) खारेज यानाः जम्मु काश्मीरयात बियातःगु विशेषाधिकार खारेज यायेवं भारतं आः न्हूगु राजनीतिक नक्सा तयार याःगु खः । उगु मामलाया बिरोध यानाः सतकय् वःपिं मनूतय्त मोदी सरकारं निर्मम दमन यात ।सदननिसें सतक तकं चर्चाया विषय जुयाच्वंगु थ्व लिम्पियाधुराया मामला आः अन्तर्राष्ट्रियकरण जुइगु जूगु दु ।

थ्व इलय् नेपाःया सदनय् नं नेपाःया नापी विभागं तयार यानातःगु सरकारी व मेमेगु संघ संस्थाय् प्रयोग जुयाच्वंगु राजनीतिक नक्साय् लिम्पियाधुरा धयातःगु कालापानी व लिपुलेक लागा नापं नेपाःया दुने लानाच्वंगु दु । थ्व मूल आधारयात धाकछोप यायेगु कुतः कथं आः भारतीय राजनीतिक नक्साय् उगु लागायात भारतीय नक्साय् लाकूगु धइगु अन्तर्राष्ट्रिय रुपं नं मिले मजूगु नक्सा खः ।

उकियात स्वीकृत यायेत नेपालं नं स्वीकृति मयाकं मगाः । उकिं थ्व मामलाय् नेपाःमित छप्पँ छधी जुयाः छसः हे यानाः न्ह्यावनेगु बाहेक मेगु विकल्प मदु । राजनीतिक पार्टीया नारा, विचार व धारणा पासां थ्व इलय् लिम्पियाधुरा नेपाःया खः धइगु धारणाय् धाःसा एकरुपता दयेमाःगु खनेदु । २०२२ सालय् नवलपसारी जिल्लाया सुस्ता अतिक्रमण याःबलय् थें थ्व इलय् नं बिरोध याये फयेके ।

सम्बन्धित बुखँ

LEAVE YOUR COMMENTS