दाहाल शंखधरपाखें प्रेरित

शंखधरपाखें प्रेरणा कयाः नेपाःया किसानतय् त्यासामुक्त यानागु बिचाः

थिमि – पुलांम्ह प्रधानमन्त्री लिसें नेकपाया अध्यक्ष पुष्पकमल दाहालं नेपाल संवत्यात आः सरकारी ज्याखँय् नं छ्यलाबुला याकेगु लागिं थम्हं फक्व कुतः यायेगु बचं बियादीगु दु ।म्हिगः थिमिइ नेवाः मुक्ति मोर्चां न्हूदँया लसताय् याःगु भिंतुना कालबिल ज्याझ्वलय् न्ववासें वय्कलं थ्व खँ धयादीगु खः ।

थः प्रधानमन्त्री जुयागु इलय् नेपाल संवत्यात राष्ट्रिय संवत् जुल धकाः घोषणा यानागु खँ लुमंकुसें वय्कलं आः थ्व संवत्यात सरकारी ज्याखँय् प्रयोग याकेगु ज्या ल्यं दनि धयादिल । नेपाल संवत्या प्रवर्तक शंखधर साख्वालं उगु इलय् त्यासाय् लानाच्वंपिं नेपाःमितय् त्यासा पुलाः समतामूलक समाज निर्माण यानादीगु खँ कँसें थः प्रधानमन्त्री जुयागु इलय् देय्न्यंकं च्वंपिं गरिब किसानतय्त ३० हजार तका तकया त्यासा मिनाहा यानागु व थ्व ज्या नं शंखधरपाखें हे प्रभावित जुयाः यानागु खः धकाः नं वय्कलं कनादिल ।

पद्मरत्न तुलाधर लगायतया भाषिक न्ह्यलुवाःतय्सं न्ह्याकूगु भाषिक समानताया आन्दोलनं नेपालय् गणतन्त्र स्थापना यानाः तःधंगु रुपान्तरण हयेगु ज्याय् योगदान याःगु खँ नं वय्कलं कनादिल । अध्यक्ष दाहालं देशय् राजनीतिक स्थिरताया लागिंं वाम एकता यासें आः प्राप्त जूगु दुई तिहाइ बहुमतया सरकारयात गय् यानाः बदनाम याये धकाः लगे जुयाच्वंपिं मनूतय्सं अनेक कथंया षडयन्त्र यानाच्वंगु कारणं उपिंपाखें बचे जुइत नं आग्रह यानादिल ।

मोर्चाया नायः दिलीप महर्जनया अध्यक्षताय् जूगु उगु ज्याझ्वलय् थिमि नपाया मेयर मदनसुन्दर श्रेष्ठं नं न्ववानादीगु खः । वय्कःपिंसं शंखधरया झ्वाताय् स्वां नं देछानादीगु खः ।