बागमतिया बैठक लिछ्यायेत माग

येँ -मुख्यमन्त्री अष्टलक्ष्मी शाक्यं विश्वासया मत कायेगु कथं थौं सःतातःगु बागमति प्रदेशसभाया बैठक लिछ्यायेगु लागिं नेकपा (एमाले) संसदीय दलं इनाप याःगु दु । एमालेया प्रदेश सांसदत थौंकन्हय् पार्टीया अधिवेशनय् व्यस्त जुयाः ई बी मफइगु जूगुलिं थौं च्वनी धयातःगु संसद बैठकया मिति सारे यानाः कार्तिक ११ गते जक च्वनेत इनाप यासें एमाले संसदीय दलं प्रदेश सभाया सचिवालययात पौ च्वःगु खः ।

एमाले संसदीय दलया मुख्य सचेतक दीपक निरौलां पार्टीया न्ह्यःने वयाच्वंगु महाधिवेशन व थ्व स्वयां न्ह्यः जिल्ला, प्रदेश व कात्तिक ६ गते वडाया समेत अधिवेशन जुइत्यंगु कारणं थःपिं सकलें वहे ज्याय् व्यस्त जुइ मालीगु जूगुलिं प्रदेशसभाया बैठकय् ई बीगु अवस्था मदुगु खँ न्ह्यथँसें उगु पौ च्वयादीगु खः ।

स्थानीय तहया अधिवेशनय् पार्टीया आम कार्यकर्ता जक मखु जनप्रतिनिधित तकं व्यस्त जुइ मालीगु कारणं थौं च्वनीगु प्रदेश सभाया बैठकय् प्रदेशसभा सदस्यतय्सं ब्वति काये मफइगु जूगुलिं मिति सारे यायेत इनाप याःगु खः ।

प्रदेशसभा सचिवालयं धाःसा थःपिंत अज्याःगु पौ प्राप्त जूसां सभामुखलिसे सहलह याये मजूगुलिं थुकिया बारे छुं निर्णय मयाःनिगु खँ धाःगु दु ।

थ्वहे झ्वलय् एमालेया उपाध्यक्ष लिसें बागमति प्रदेशया मुख्यमन्त्री अष्टलक्ष्मी शाक्यं पार्टीया वडा अधिवेशन व पालिका अधिवेशन यायेगु पार्टीया निर्णय प्रति असन्तुष्टि प्वंकादीगु दु । म्हिगः जूगु एमाले बागमति प्रदेशया अधिवेशनय् न्ववायेगु झ्वलय् मुख्यमन्त्री शाक्यं वडा अधिवेशन याना हे छ्वयेगु व न्ह्याम्हनेतृत्व वःसां जिउ धइगु पक्षय् थः मदु धासें पार्टीयात छप्पँ यायेगु खःसा गुटपाखें थ्वयात मुक्ता यायेमाःगु बिचाः नं तयादिल ।