
येँ (नेपालभाषा टाइम्स) – उपत्यका नगरपालिका फोरमं स्वनिगलय् अनलाइन शिक्षा शुल्कय् एकरुपता हयेगु निंतिं थःगु थासं कुतः न्ह्याकूगु दु। सरकारं स्थानीय तहयात बिउगु जिम्मेवारीकथं उपत्यका नगरपालिका फोरमं अनलाइन शिक्षाया शुल्कय् एकरुपता हयेगु कुतःकथं थ्व सम्बन्धय् सहलह ब्याकूगु दु । सरकारं जारी याःगु निर्देशिकां स्थानीय तहयात अनलाइन शुल्कय् एकरुपता हयेगु जिम्मेवारी बियातःगु दु। थ्व हे जिम्मेवारीकथं फोरमं सहलह ब्याकूगु खः ।
फोरमया सचिवलिसें मध्यपुर थिमि नगरपालिकाया प्रमुख मदनसुन्दर श्रेष्ठं शिक्षाया शुल्कया विषययात कयाः स्वनिगःया थीथी महानगर, नगरपालिकाया प्रमुख, उपप्रमुखलिलसे सहलह शुरु यानागु खँ कनादीगु दु। महामारीया रुपय् न्यना वनाच्वंगु कोभिड-१९ संक्रमणया कारणं विद्यालय बन्द जुयाच्वंगु अवस्थाय् सरकारं लिपांगु इलय् अनलाइन शिक्षा संचालन यायेगु व शुल्क सम्बन्धी व्यवस्था यायेगु खँ धाःगु खः ।
फोरमया सचिव नगरप्रमुख श्रेष्ठं शुल्कय् एकरुपता हयेगु निंतिं छुं दिं न्ह्यः अनलाइनया माध्यमं व भौतिक दूरी कायम यानाः प्रत्यक्ष रुपं नापलानाः नं सहलह शुरु यायेधुंगु धयादिल । वय्कलं सहलहपाखें सकसिगुं राय, सल्लाह कयाः फोरमं शुल्क क्वःछीगु निंतिं आवश्यक निर्णय यानाः सरकारयात सिफारिस यायेगु धयादीगु दु ।
थ्व हे झ्वलय् अझ नं सार्वजनिक सवारी साधन संचालन यायेमाः धइगु पक्षय् थःपिं मदुगु वय्कलं स्पष्ट यानादीगु दु। सार्वजनिक सवारी साधन तत्काल संचालन याये मजिउ धइगु पक्षय् थःपिं दुगु धासें वय्कलं धयादिल, ‘स्वनिगःया नगरपालिकातय्सं तत्काल सार्वजनिक सवारी साधन खुले याये मजिउ धासें सरकारयात सुझाव तकं बियागु दु ।’
असोज १ गतेनिसें सार्वजनिक यातायात संचालन यायेगु धकाः सरकारं निर्णय यायेवं थुकिं स्वनिगलय् कोरोना संक्रमणया जोखिम अझ अप्वया वनीगु फोरमं न्ह्यथंगु दु ।
वय्कलं कोरोना भाइरस संक्रमणं स्वनिगःया बांमलाक प्रभावित यानाच्वंगु व थ्व सन्दर्भय् थुकियात नियन्त्रण यायेगु थीथी उपाययात कयाः नं फोरमं सहलह ब्याका वयाच्वंगु धयादिल ।
लिपांगु इलय् देय्न्यंकं कोरोना संक्रमितमध्ये बछि धइथें स्वनिगलय् खने दयाच्वंगु दु। पीद्वः स्वयां अप्वः परीक्षण यायेगु झ्वलय् करिब न्हय्द्वःया ल्याखय् जक पोजिटिभ खनेदुगुलिं अझ नं समुदाय दुने दुहां वने मफयाच्वंगु फोरमं निष्कर्ष पिकाःगु दु ।
LEAVE YOUR COMMENTS