बागमतिइ न्हूगु प्रविधि

येँ -न्हूगु प्रविधि छ्यलाः पशुपति क्षेत्रया गृह्येश्वरीनिसें तिलगंगा तकया खुसिइ सफा लः छ्वयेगु तयारी जुयाच्वंगु दु । थुकिया निंतिं पशुपति विकास कोषं अध्ययन यायेत्यंगु खँ कोषया सदस्य सचिव प्रदीप ढकालं कनादीगु दु । वय्कःया कथं सफा लः छ्वयेगु निंतिं कोषं बायो शौचालय प्रविधि हयेगु तयारी यानाच्वंगु दु ।

पशुपति क्षेत्रय् सफा लः बाः वंकेत सरकारं २०५१ सालंनिसें अधिकार सम्पन्न बागमति समिति स्थापना यानाः ज्या यानाच्वंगु दुसां खुसि धाःसा सफा जुइ फुगु मदुनि । कोषं पशुपतिइ क्षेत्रय् न्हूगु शौचालयया फोहोरयात अन हे प्रशोधन यानाः खुसिइ छ्येगु तयारी यानाच्वंगु खः ।

न्हूगु प्रविधि छ्यलाः बागमतिइ लःया बहाव नं अप्वयेकेगु कोषया तयारी दु । बागमतिइ २०७० साल जेठ ५ गते म्वः ल्हुइ जिल धकाः घोषणा याःगु खःसां नं हाकनं फोहोर जुयाः न्या तकं म्वाये मफइगु अवस्था ब्वलंगु खः ।