मंकाः खलःया दबूछेँ जग स्वन

नेपालभाषा टाइम्स

येँ – राजधानी येँदेय्या नेवाःतय्सं वंगु प्यंगू दशक न्ह्यवंनिसें खंका वयाच्वंगु म्हगस आः पूवनीगु अवस्थाय् थ्यंगु दु । नेपालभाषा मंकाः खलःया ‘मंकाः दबूछेँ’ धस्वाकेगु निंतिं म्हिगः छगू ज्याझ्वःया दथुइ दबूछेँया जग स्वनेज्या जुल । येँ महानगरपालिकाया मेयर विद्यासुन्दर शाक्य लिसें उपमेयर हरिप्रभा खड्गी श्रेष्ठ, नेपालभाषा मंकाः खलःया नायः दुर्गालाल श्रेष्ठ, संस्थापक नायः मदुम्ह पद्मरत्न तुलाधरया जहान मय्जु निल शोभा तुलाधर, संस्थापक दुजः मदुम्ह काजीलाल श्रेष्ठया जहान मय्जु लक्ष्मी श्रेष्ठ व राष्ट्रिय न्हूदँ समारोह समिति–११४० या नायः रमेश महर्जनं मंकाः कथं दबूछेँया जग स्वनादीगु खः ।

ज्याझ्वलय् नुगःखँ प्वंकादिसें मूदुजः मेयर शाक्यं नेवाःतय्सं ताःई न्ह्यवंनिसें खंका वयाच्वंगु दबूछेँ निर्माणया म्हगस पूवंकेत महानगरपालिकापाखें माःगु ग्वाहालि यायेगु बचं बियादिल । थ्व दबूछेँ उपभोक्ता समिति गठनया मोडलं दयेका वनेगु कि मनपापाखें हे टेण्डर प्रक्रियापाखें दयेका वनेगु खः निर्णय यायेत नं वय्कलं इनाप यानादिल ।

मंकाः खलःया संस्थापक छ्यांज्ये लिसें आःया न्वकु मल्ल के. सुन्दरं मंकाः खलःयात झी कवि चित्तधर हृदयं १० आना जग्गा बिउगु व मेगु जग्गा मंकाः खलकं त्यःछिंत्यः म्हिताः मुंकातःगु ध्यबां न्यानागु जानकारी बियादिल ।
ज्याझ्वलय् उगु हे क्षेत्रया सांसद जीवनराम श्रेष्ठ व उगु वडा १५ या वडा अध्यक्ष ईश्वरमान डंगोलं थःपिनिगु क्षेत्रय् मंकाः खलःया दबूछेँ धस्वाकेत्यंगु तसकं लसताया खँ खः धासें थुकिया लागिं माःगु तकया ग्वाहालि थःपिंसं याये धयादिल ।

मंकाः खलःया छ्यांज्ये राजा शाक्यं लसकुस यासें न्ह्याकूगु उगु ज्याझ्वलय् अध्यक्ष दुर्गालाल श्रेष्ठ, दांभरिं गणेश साय्मि, नेवाः देय् दबूया महासचिव माइलाबाबु द्यःला व राष्ट्रिय न्हूदँ समारोह समिति–११४० या नायः रमेश डंगोलपिंसं नुगःखँ प्वंकेगु झ्वलय् ताःई न्ह्यवंनिसें दयेके धयां नं दयेके मफयाच्वंगु थ्व दबूछेँ आः छुं नं कथंया विवाद मवयेक दयेकेमाःगु खँय् बः बियादिल ।