‘चिपगु नीलः’या न्हापांगु प्रदर्शन

येँ (नेपालभाषा टाइम्स)- बाखंमि केशरमान ताम्राकारया बाखं ‘चिपगु नीलः’या बाखनय् दयेकूगु चिहाकः संकिपा प्रदर्शनय् वःगु दु । ल्याय्म्ह निर्देशक योवन शाक्यं निर्देशन यानादीगु थुगु चिहासंकिपा वंगु शनिवाः कीर्तिपुर सिनेप्लेक्सय् न्हापां क्यनेज्या जूगु खःसा उबलय् निसें युट्युबय् नं प्रदर्शनय् वःगु दु ।

जनकवि दुर्गालाल श्रेष्ठ मूपाहाँ कथं झायादीगु न्हापांगु क्यनेज्याझ्वलय् बाखंच्वमि मथुरा साय्मि, हितकरवीर सिंह कंसाकार, गुज्येश्वर मानन्धरपिं पाहाँ कथं झायादीगु खः । थुगु चिहासंकिपाया बाखं ने.सं. १०९७ य् च्वयातःगु बाखं खः । थुगु बाखं ने.सं. १०९७ य् जूगु नेपालभाषा साहित्य सम्मेलनय् न्हाप लाःगु खःस । तर ने.सं. ११०३ य् पिदंगु बाखंमि ताम्राकारया बाखंमुना सफू ‘जि विश्वासय् म्वाये’ य् सफुलि न्हापांखुसी प्रकाशनय् वःगु खः ।

जनक महर्जनया सभापतित्वय् जूगु न्हापांगु क्यनेज्याझ्वलय् थुगु चिहासंकिपाया कलाकार, प्राविधिक लिसें ग्वाहालिमिपिंत सुभाय्पौ लःल्हाःगु खः । संकिपाय् निरिशा महर्जनं मू भूमिका म्हितातःगु दुसा मनोज महर्जन, सलिना महर्जन, हसना महर्जन, चिरिबाबु महर्जन, ओसमि रंजितकार, नविन थेच्वमि, गंगा महर्जनपिंसं म्हितातःगु दु ।