मातृभाषा पत्रकारिता दिवस हन
येँ – नेपालभाषाया न्हापांम्ह पत्रकार धर्मादित्य धर्माचार्यया बुन्हिया लसताय् म्हिगः खुक्वःगु मातृभाषा पत्रकारिता दिवस न्यायेकल । नेवाः पत्रकार राष्ट्रिय दबूया ग्वसालय् म्हिगः अनलाइन माध्यमं थ्व दिवस न्यायेकूगु खः ।
पत्रकार दबूया केन्द्रीय नायः सुरजवीर वज्राचार्यया सभापतित्वय् जूगु उगु ज्याझ्वलय् न्ववासें आदिवासी जनजाति पत्रकार महासंघया नायः दण्ड गुरुङं नेपाल पत्रकार महासंघ आः तक नं जनजाति पत्रकारतय् संस्था जुइ मफुनि धासें उकिया लागिं पहल यायेमाःगु बिचाः तयादिल । मधेसी पत्रकार समाजया नायः मोहन सिंहं मातृभाषां पत्रकारिता याइपिं पत्रकारतय् आर्थिक अवस्था बांलाः मजूसां नं उमिसं भाषिक मतिनाया कारणं ज्या यानाच्वंगु खः धयादिल । नेपाल पत्रकार महासंघया केन्द्रीय सचिव नारायण किलम्बुं पत्रकार महासंघ दुने थम्हं आः आदिवासी जनजाति पत्रकारतय् लागिं ज्या याना वनेगु खँ कनादिल ।
पत्रकार दबूया निवर्तमान नायः श्रीकृष्ण महर्जनं मांभासं पत्रकारिता यायेगु अधिकार अन्तर्राष्ट्रिय कानूनं समेत बियातःगु जुयाः उकिया उपभोग आदिवासी जनजातितय्सं यायेमाःगु बिचाः तयादिल । पत्रकार दबूया सल्लाहकार सुरेश किरणं आः प्यदँ लिपा मातृभाषां पत्रकारिता शुरु जूगु सछिदँ क्यनीगु अवसरयात विशेष कथं हनेमाःगु प्रस्ताव तयादिल । ज्याझ्वलय् वरिष्ठ न्वकु नृपेन्द्रलाल श्रेष्ठं लसकुस यासें आः थःपिंसं याकनं ने मातृभाषा पत्रकारिता सम्मेलन यायेत्यनागु जानकारी बियादिल ।
LEAVE YOUR COMMENTS