अमेरिकाय् बसुन्धरा धलं

येँ- अमेरिकाय् नं न्हापांखुसी बसुन्धरा व्रत साधना याइगु जूगु दु । अमेरिका–नेपाल परम्परागत बौद्ध धर्म संघया ग्वसालय् थौं व कन्हय् निन्हुयंकं थ्व व्रत साधना यायेत्यंगु खः । मेरिल्याण्डस्थित नेपाल शिक्षा तथा सांस्कृतिक केन्द्र वेल्सभिलया लाछिइ थ्व बसुन्धरा व्रत जुइ ।

तिथि कथं दकलय् बांलाःगु न्हिया रुपय् थौं व कन्हय् जुइगु थ्व बसुन्धरा धलं दनेज्या लुम्बिनी विविया पुलांम्ह उपकुलपति प्रा.डा. नरेशमान वज्राचार्यया निर्देशनय् प्रमुख उपाध्याय समन्त वज्राचार्य व सहायक आचार्य यज्ञमान शाक्यपिं गुरुजुया रुपय् यायेत्यंगु खः ।

ज्याझ्वःया मू प्रायोजक एनईसीसी, नेपाः पासा पुचः अमेरिकाय् व नेवाः अर्गनाइजेशन अफ अमेरिका खः । स्वनिगलय् तसकं लोकंह्वाःगु थ्व बसुन्धरा धलं दन धाःसा भौतिक जक मखु आध्यात्मिक सुख नं प्राप्त जुइ धइगु जनविश्वास दु ।