दर्ता मजूगु मोबाइल चले मजुल

येँ (नेपालभाषा टाइम्स)- जेठ १ गते साेमवाः निसें भन्साः पुलामहःगु मोबाइल फोन चले मजुइगु जूगु दु । नेपाल दूरसञ्चार प्राधिकरणं अवैध फोन नियन्त्रणया निंतिं साेमवाःनिसें भाइस म्यानेजमेन्ट सिस्टम (एमडिएमएस) लागू याःगु खः । प्राधिकरणं धाःकथं वैशाख ३१ गते तक सीम तःगु न्ह्यागु फोन जूसां अटोमेटिक चले जुइ । जेठ १ गते निसें धाःसा अवैध रुपं भन्साः मपुसे हयाः प्राधिकरणय् दर्ता मयाःगु फोन चले जुइमखु ।

एमडिएमएस लागु जुइवं आः विदेशं छगलं अप्वः मोबाइल ज्वना वयेबलय् थप हयागु मोबाइलया भन्सारय् एयरपोर्ट पुले माः । मोबाइलया भाःया आधारय् ५ प्रतिशत भन्सार शुल्क व १३ प्रतिशत भ्याट काइ । मोबाइलया भन्साः कायेगु निंतिं जक विमानस्थलया भन्सार कार्यालयय् खुगू काउन्टर थप यायेधुंकूगु दु ।

सरकारं वैदेशिक रोजगारीइ म्होतिं नं खुला तक ज्या यानावःपिंत निगः मोबाइल हयेदइगु व्यवस्था याःगु दु । उमिसं विमानस्थलया भन्सारय् थःगु राहदानी क्यन धायेवं तुरुन्त हे निगः मोबाइलयागु प्रज्ञापनपत्र दयेकाबीगु खँ धाःगु दु ।