ने. सं. ११४३ चौलाथ्व तृतीया -

महामारी न्यंकेफुगु मेगु भाइरस लुइकल

बिबिसी- विश्वब्यापी रुपं महामारी न्यंकेगु क्षमता दुगु मेगु छगू न्हूगु भाइरस लूगु दु । थ्व भाइरस नं दकलय् न्हापां चीनय् हे लूगु दु । सुंगुरय् दकलय् न्हापां खनेदुगु थ्व भाइरस नं फ्लु भाइरस हे खः । वैज्ञानिकतय् नकतिनि जक विकसित जुयावःगु थ्व भाइरसं नं मनूतय्त संक्रमण यायेफु ।

थ्व भाइरसया संरचना परिवर्तन यायेफुगु क्षमता दुगु व मनुखं मनूयात सरे जुइफुगु जूगुलिं विश्वन्यंकं न्यनीगु सम्भावना दुगु धासें अनुसन्धानकर्तातय्सं चिन्ता प्वंकाच्वंगु दु ।

थ्व भाइरसं तत्कालया निंतिं समस्या खनेमदुनिसां थुकी मनूयात संक्रमण जुइफुगु फुक्क कथंया गुण दुगुलिं थ्व भाइरसयात कयाः ध्यान बियाच्वनेमाःगु खँ धाःगु दु । थ्व भाइरस न्हूगु जूगुलिं मनूतय्के थुकिया प्रतिरोध यायेगु न्यून वा शून्य क्षमता जक दु ।

प्रोसिडिङ्स अफ द नेशनल एकेदमि अफ साइन्सेज नांया जर्नलय् वैज्ञानिकतय्सं थ्व भाइरसयात नियन्त्रण तयेत सुंगुर लहीगु ज्या यानाच्वंपिं मनूतय्त निगरानी तयेमाःगु सुझाव बियातःगु दु । वैज्ञानिकतय् कथं थ्व भाइरस सन् २००९ य् न्यनावंगु स्वाइन फ्लूलिसे मिले जू वः । तर थुकी छुं भिन्नता नं दु ।

थ्व भाइरस आःतक न्यनावंगु ला मदुनि, तर थुकिया अनुसन्धान यानाच्वंम्ह प्राध्यापक किन चाउ चाङ व वया सहकर्मीतय् कथं थुकिया निगरानी धाःसा बल्लाक यायेमाःगु खँ धाःगु दु । अनुसन्धानकर्तातय्सं थ्व भाइरसयात जी४ईए एच१एन१ नां बिउगु दु । थ्व भाइरसं मनूतय् श्वासनली च्वंगु कोषय् अप्वइगु व न्यनावनीगु खँ धाःगु दु ।

बेलायतया नटिङ्गम युनिभर्सिटीइ ज्या यानाच्वंम्ह प्राध्यापक किन चाउ चाङं बिबिसीयात धाःगु दु, ‘आः कोरोना भाइरसया कारणं झीगु ध्यान उखेपाखे जक वनाच्वंगु दु, तर सम्भावित खतरनाक न्हूगु भाइरसयात बेवास्ता यायेमजिउ ।’