‘जिमिगु न्ह्यःने धात्थें तःधंगु अवसर दु,’ नेपाली क्रिकेट टिमया कप्तान पारस खड्काया धापू खः थ्व । वइगु छुं न्हि दुने नेपाःया क्रिकेट तःधंगु परीक्षा दथुं न्ह्याइगु जुइ । थ्वयात खास धायेगु खःसा परीक्षा सिबें अवसर धायेगु पाय्छि जुइ । धाथें तसकं तःधंगु अवसर । छु गथे खः ले थ्व ? वइगु प्यद“या नितिं नेपाःया न्ह्यःने दु, वान डे टिमया मान्यता कायेगु । प्यद“या थ्व ईयात अन्तर्राष्ट्रिय क्रिकेट काउन्सिल (आईसीसीं) छगू चक्रया कथं परिभाषित याना च्वंगु दु । जिम्बाब्वेय् मार्च ४ निसें २५ तक जुइत्यंगु दु, आईसीसी विश्वकप छनोट । आईसीसी विश्वकप छनोटयात थ्व पालय् ति यक्व महŒव न्हापा बिउगु खनेमदु । न्ह्यागु जुइमा एकदिवसिय विश्वकप न्ह्यः तसकं तःधंगु च्याम्पियनसिप खः थ्व । मुक्कं झिगू टिमं ब्वति काइ, अले थुपिं टिमयात निगू पुचलय् विभाजन यानातःगु दु । न्हापालाक्क समूह चरणय् कासा जुइ, अनलिं सुपर सिक्सया कासा । ईया ल्याखं तसकं ताःहाकःगु च्याम्पियनसिप नं खः ।

अले थ्व छनोटया न्हापांगु निगू थासय् लाःगु टिम विश्वकपय् छनोट जुइ । छनोटया बम्पर उपहार थ्व हे खः, अले छगू ईया विश्व क्रिकेट महाशक्ति वेस्ट इन्डिजं तकं थुकी म्हितेत्यंगु दु । वेस्ट इन्डिज नापं न्हापांगु पुचलय् दु, आयरल्यान्ड, नेदरल्यान्ड्स, पपुवा न्युगिनी व यूएई । अले मेगु पुचलय् नेपाः नापं दु, जिम्बाब्वे, अफगानिस्तान, स्कटल्यान्ड व हङकङ । थ्व विश्वकप छनोटय् नेपाःया आज्जु छु खः ले ? धायेत ला विश्वकपय् छनोट हे खः धाःसां जिउ । तर धायेत धायेगु हे जक ख“ जुइ । धाथें धायेगु खःसा नेपाःया आज्जु धयागु शीर्ष च्यागूगु थासय् लाकेगु खः । अथे धयागु ‘टप एट’ । थुकिया मतलब नेपाःया छतायां छता आज्जु जुइमाः, हाकनं आईसीसी वल्र्ड क्रिकेट सिरिज डिभिजन टु पाखे घटुवा मजुइगु । विश्वकप छनोटय् अन्तिम निगूगु थासय् लाइगु टिम हे रेलिगेसनय् लाइ । थ्वपाखें मुक्त जुइफुसा निता फाइदा जुइ । न्हापांगु नेपाःया टिमं हाकनं छक्वः डिभिजन टु म्हितेमाली मखु ।

व सिबें तःधंगु उपलब्धी, नेपाः प्यद“या नितिं वान डे मान्यता प्राप्त टिम जुइ । नेपाःया टिमं थ्व उपलब्धी आत्मसात् यायेफत धाःसा थ्व धाथें तःधंगु हे ऐतिहासिक प्रदर्शन जुइ । अले तय दु, थुकिं नेपाःया क्रिकेटयात सकतां कथं बांलाः हे जक याइ । गथे नेपाः विश्वकप छनोटय् फाइनल थ्यनी धकाः दाबी यायेगु पाय्छि मजू, उकिया अःखः, नेपाः ‘टप एट’ य् लाइ धकाः दाबी यायेगु थाय् धाःसा यक्वं दु । थ्व वास्तवय् हे दाबी यायेबहगु दाबी खः ।
नेपाःया निंतिं स्कटल्यान्ड व हङकङयात बुकेफइगु सम्भावना उतिकं दु । छगू कथं नेपाःया नितिं थुपिं बराबरया टिम खः । लिपांगु इलय् अफगानिस्तान झीगु न्ह्यःने बल्लाःगु टिम सावित जूगु दु, तर उमिगु विरुद्ध नं जीतया लिच्वः हयेगु असम्भव मखु, न त जिम्बाब्वेयात बुके मफइगु छुं कारण दु । धात्थें धायेगु खःसा ला नेपाःया निंतिं अःपुगु पुचः लाःगु दु, पुचः ‘ए’ नाप तुलना यायेगु खःसा । उकिं हे पारसं धाःगु खः, ‘नेपाः नं आः छुं याये फुगु टिम खः ।’

सम्बन्धित बुखँ

LEAVE YOUR COMMENTS