भाग्यमानी वाजनेस्की

सुनानं सुयातं ‘छ बांलाःम्ह कासामि ला खः, तर तसकं बांलाःम्ह नं मखु’ धाःसा गथे अनुभव जुइ ? टेनिस कासामि क्यारोलिन वाजनेस्कीयात नं तःक्वः हे थथे धाःगु दु, व नं यक्वसिनं । सन् २०१० य् व मिस्तय् डब्लूटीए वरीयताय् न्हापांगु थासय् लाःगु खः । अथे धयागु मिस्तय् टेनिसया दकलय् बांलाःम्ह कासामि जूगु खः । तर वया यक्व धयाथें आलोचकतय्सं उबलय् हे धाःगु खः, ‘वाजनेस्की नम्बर १ कासामि ला जुल, तर व उकिया निंतिं योग्य धाःसा मखु ।’

थुकिया मतलब ला थ्व हे जुल कि, ‘छ बांलाःम्ह कासामि ला खः, तर तसकं बांलाःम्ह नं मखु’ । उगु इलय् वाजनेस्कीया तसकं नुगः स्याःगु खः, गुगु स्वाभाविक नं खः । थथे द्वपं छाय् ले ? विश्व टेनिसया छगू ल्वय् दु, छुं नं ग्रान्डस्लाम त्याकेमफुम्ह कासामियात हेपे यायेगु । यक्वसिया निंतिं सुनां ग्रान्डस्लाम उपाधि त्याकल, व बांलाःम्ह कासामि खः, मखुसा वयात गथे यानाः अथे धायेगु धयागु पूर्वाग्रह । वाजनेस्की धात्थें नम्बर १ ला कासामि जुल, तर वं उबलय् तक छगू नं ग्रान्डस्लाम त्याकेमफुनि ।

ग्रान्डस्लाम धयागु अस्टे«लियन ओपन, फ्रेन्च, विम्बल्डन व यूएस ओपन खः । वाजनेस्की निक्वः तक यूएस ओपनया फाइनलय् थ्यन, तर निक्वलं पराजित जुल । अथे धयागु सन् २००९ व २०१४ । निक्वलं फाइनलय् बुइवं वयात कयाः धायेगु नं सुरु जुल— वाजनेस्की धात्थें अभागि कासामि खः, वं गुबलें छुं नं ग्रान्डस्लाम त्याके फइमखु । थुकिया झ्वलय् वया नीजि जीवनय् नं यक्व उतारचढाव वल, विशेषतः वया मतिनाया मामिलाय् । छगू इलय् वाजनेस्की व गल्फया स्टार कासामि रोरी म्याकरोय गर्लफ्रेन्ड ब्वाइफ्रेन्ड कथं च्वना वयाच्वंगु खः ।

निगू कासाया दकलय् उत्कृष्ट निम्ह कासामि दथुया मतिना, चर्चित त्यपू जुइत पर्याप्त खः । तर छन्हु समाचार वल— थःगु कासाय् जक केन्द्रित जुइत म्याकरोयं वाजनेस्कीयात त्वःतल । थुकिया निंतिं प्रायः छ्यलीगु खँग्वः खः– डम्प । अथे धयागु म्याकरोयं अजूचायापुक थः प्रेमी वाजनेस्कीयात ‘डम्प’ यात । थथे जूगुलिं नं वाजनेस्कीयात अभागि धाइपिं अझ यक्व दत । थ्व झ्वलय् वया कासा तसकं क्वह्यना वन । नकतिनि क्वचाःगु अस्ट्रेलियन ओपन धाःसा वया निंतिं भाग्यशाली सावित जुल ।

वं थुगुसीया न्हापांगु ग्रान्डस्लाम अस्ट्रेलियन ओपनया फाइनल जक थ्यंगु मखु, मेलबर्नय् जूगु फाइनल नं त्याकल । फाइनलय् वं सिमोन हालेपयात बुकूगु खः । उपाधि त्यायेवं वं धाःगु खः, ‘थ्व छगू अज्याःगु ई खः, गुकियात जिं पियाच्वनागु आः मखु, यक्व दत । आखिरय् जिं ग्रान्डस्लाम त्याकां क्यना । जिगु दक्वं म्हगस आः पूवंगु दु ।’ अस्ट्रेलियन ओपन त्यायेवं व यक्वसिया निंतिं बांलाःम्ह कासामि नं जूगु दु । अथे धयागु आः वाजनेस्की भाग्यमानी नं जुल, अले बांलाःम्ह कासामि नं ।