लियोनल मेसीं बर्सिलोना त्वःतेमाल

एजेन्सी- अर्जेन्टिनाया स्टार कासामि लियोनल मेसीं बार्सिलोना त्वःतूगु दु । बिहिवाः स्थानीय ईकथं बहनिसिया ८ ता इलय् बार्सिलोनां छगू विज्ञप्ति पिकयाः थुकिया जानकारी बिउगु खः । बार्सिलोना व मेसीया दथुइ जुइधुंकूगु सम्झौता हे आर्थिक व ला लिगाया संरचनात्मक पंगःया कारणं सम्झौता रद्द जूगु खः ।

बार्सिलोना व मेसीया दथुइ मेगु न्यादँया निंतिं आः बियाच्वंगुसिबें बछि तलबय् बार्सिलोनाय् च्वनेगु सम्झौता जुइधुंकूगु खः । तर थुकी बार्सिलोनां मेपिं कासामि मीफुसा जक सम्झौता कायम जुइगु शर्त दयाच्वंगु खः । तर बार्सिलोनां मेपिं कासा मीमफुगुलिं ला लिगाया छगू क्लबं थुलि तक खर्च याये दइगु धयागु नियमं पिने लाःवंगुलिं मेसीलिसे सम्झौता त्वाःथले माःगु खः । सम्झौता मजूगुलि क्लब व मेसी निगुलि पक्षयात दुःख जूगु खँ क्लबं धाःगु दु ।

मेसीं बार्सिलोना त्वःतेवं आः व गुगु क्लबय् वनी धयागु चर्चा शुरु जूगु दु । स्पेनिस पत्रिका मार्काया कथं मेसी इंग्लिस क्लब म्यानचेस्टर सिटी वनीगु सम्भावना दु । मेगु सम्भवना धइगु फ्रेन्च क्लब पिएसजी खः । म्यानचेस्टर युनाइटेड व युभेन्ट्सया नां नं न्ह्यःने वयाच्वंगु दु ।

मेसी सन् २००० निसें बार्सिलोनाया निंतिं म्हिता वयाच्वंगु खः । बार्सिलोनाया निंतिं मेसीं ३५ गू उपाधि त्याकूगु दु । थ्व झ्वलय् ६७२ गोल यासें १० गू ला लिगा व प्यक्वः च्याम्पियन्स लिग त्याकूगु नं खः ।