आः लछिया छकः यातायात बन्द

येँ (नेपालभाषा टाइम्स) – कोरोना भाइरस संक्रमणयात पनेगु लागिं नेपाल सरकारं लागू याःगु लकडाउनं यानाः यक्व थासय् नकारात्मक लिच्वः लाःगु दु। तर पर्यावरणीय ख्यलय् धाःसा थुकिं सकारात्मक लिच्वः नं लाःगु खँ पिहां वयाच्वंगु दु। लकडाउनया कारणं लाःगु थ्वहे सकारात्मक लिच्वःपाखें पाठ सयेकाः आः येँ महानगरपालिकां थुकियात नीतिगत रुपं हे कार्यान्वयन यायेगु तयारी शुरु याःगु दु ।

लकडाउनया इलय् यातायात पूर्ण रुपं बन्द जूगुलिं स्वनिगःया वातावरणय् आपालं सकारात्मक लिच्वः लाःगु जुयाः उकियात स्थायी रुपं हे लागू याना यंकेगु लागिं आः मनपां लछिया छकः ‘भेहिकल फ्री डे’ घोषणा यानाः यातायात पूर्ण रुपं बन्द यायेगु ग्वसाः दयेकूगु दु। मनपां नकतिनि पारित याःगु थःपिनि नीति तथा कार्यक्रमय् थ्व नीति बारे नं उल्लेख यानातःगु दु ।

वकुन्हु रिङरोड लागा दुने निजी सवारी साधन चले याके मबीगु खँ नीति तथा कार्यक्रमय् न्ह्यथनातःगु दु। वकुन्हु पैदल न्यासि वनीपिं व साइकल गइपिंत जक प्रोत्साहन बीगु मनपाया नीति दु। महिनाया छु दिनय् ‘भेहिकल फ्री डे’ लागू जुइ धइगु खँ धाःसा निर्णय याःगु मदुनि। उकिया लागिं अध्ययन यानाः थ्व दिन समेत क्वःछीगु व नीति कार्यान्वयन याना यंकेगु खँ मनपा सूत्रं धाःगु दु ।

लकडाउनया इलय् यातायात पूर्ण रुपं बन्द जूगुलिं स्वनिगःया वातावरण तसकं बालाःगु व थन धू व कुँपाखें जुइगु प्रदुषण समेत गाक्कं म्हो जूगु रिपोर्टत वःगु खः । थुकियात हे ध्यानय् तयाः मनपां आः लछिया छकः जक जूसां यातायात निषेध यानाः पर्यावरणीय सुधारया लागिं पलाः न्ह्याकेत्यंगु खँ नं धाःगु दु ।

सरकारं लकडाउन खुले याना बीवं स्वनिगलय् यातायात हानं सुचारु जूगुलिं थन धू व कुँया प्रदुषण पुनः न्हापा थें शुरु जुइधुंकूगु दु ।