बागमती प्रदेशय् ऐतिहासिक भाषा ऐन शुभारम्भ

येँ (नेपालभाषा टाइम्स)÷बागमती प्रदेश सरकारं नेपालभाषा व तामाङ भाषायात नं प्रदेशया सरकारी ज्याखँया भाषा जुइ कथं पारित यानातःगु भाषा सम्बन्धी ऐन म्हिगःनिसें कार्यान्वयनय् वल । प्रदेश सरकारं वंगु कार्तिक २३ गते थ्व ऐन प्रदेश राजपत्रय् पिथंगु खःसा राजपत्रय् पिहां वःगुयां १८० न्हु लिपा कार्यान्वयनय् वनीगु प्रावधान कथं म्हिगःनिसें थ्व ऐन सक्रिय जूगु खः ।
थ्व लसताय् म्हिगः येँया बसन्तपुलिइ जूगु छगू तःजिगु समारोहय् प्रधानमन्त्री पुष्पकमल दाहाल प्रचण्डं बागमती प्रदेशया थुगु ‘प्रदेश सरकारी कामकाजको भाषा सम्बन्धमा व्यवस्था गर्न बनेको ऐन–२०८०’ शुभारम्भ जूगु घोषणा यानादीगु खः ।

शुभारम्भ ज्याझ्वःयात सम्बोधन यासें प्रधानमन्त्री प्रचण्डं थ्व ऐन लागू जूगु न्हि नेपाःया स्वाधीनता, स्वतन्त्रता व आत्मनिर्भरताया पक्षधर सकल जनताया लागिं लसताया न्हि खः धयादिल । थुगु ऐन बागमती प्रदेशपाखें हःगु खःसां थुकिया दूरगामी व राष्ट्रिय महत्व दुगु जुयाः संघीय राजधानीइ हे शुभारम्भ समारोह यासें संघीय सरकारपाखें समेत थ्वयात उलि हे महत्व बियागु खँ वय्कलं कनादिल । बागमती प्रदेशया माननीय मुख्यमन्त्रीजुपाखें थ्व ऐन हयाः छगू साहसिक ज्या यानादीगु दु धासें प्रम प्रचण्डं उकिया आः थ्व ऐन लागू यायेत माःगु ग्वाहालि नं यायेगु बचं बियादिल ।

प्रम प्रचण्डं थः न्हापांखुसी प्रधानमन्त्री जुयागु इलय् नेपाल संवत्यात राष्ट्रिय संवत् कथं मान्यता बियागु खँ लुमंकादिसें धयादिल, ‘स्वक्वःखुसी प्रधानमन्त्री जुयागु इलय् नेपाल संवत्यात सरकारी दस्तावेजय् उल्लेख याकेगु ज्या यानागु दु । आः नेपालभाषा व तामाङ भाषायात सरकारी ज्याखँय् छ्यलेगु निर्णयलय् नं सहभागी जुइ खन ।’

ऐन कार्यान्वयनय् वःगु लसताया खँ खःसां थुकियात कार्यान्वयन याना वनेगु सवालय् अझ नं यक्वं हाथ्यात दनिगु खँ नं वय्कलं कनादिल । थ्व ऐन कार्यान्वयन याना वनेगु सवालय् पिहां वइगु हाथ्यात समाधान याना वनेगु लागिं नं प्रदेश सरकारयात माःगु फुक्क कथंया ग्वाहालि संघीय सरकारपाखें चूलाका बीगु बचं वय्कलं बियादिल । वय्कलं थ्व कानुन पारित यायेगु सन्दर्भयात न्ह्यथँसें भाषिक समानताया लागिं वरिष्ठ मानव अधिकारवादी नेता मदुम्ह पद्मरत्न तुलाधरं म्हितादीगु भूमिकायात नं स्मरण यानादिल ।

ज्याझ्वलय् भिंतुना न्वचु बिसें नेवाः देय् दबूया नायः पवित्र वज्राचार्यं थ्व ऐनयात आः व्यवहारय् लागू यायेगु सवालय् आपालं समस्यात वये फइगुपाखे संकेत यानादिल । वय्कलं धयादिल, ‘बागमती प्रदेश सरकारं थौं घोषणा याःगु सार्वजनिक बिदा बीगु सवालय् म्हिगः येँ महानगरपालिकपाखें यक्वं आनाकानी यात । थुकिं प्रदेश सरकारपाखें पारित याःगु भाषा सम्बन्धी ऐन कार्यान्वयन यायेगु सवालय् नं आपालं न्ह्यसःत पिहां वइगु संकेत बिउगु दु ।’

तामाङ घेदुङया नायः मोहन गोलें भाषिक अधिकार माल धकाः न्हापा थःपिंसं आन्दोलन याना जुयागु खःसा आः व आन्दोलनपाखें उपलब्धी चूलाःगु लसताया खँ खः धयादिल । बागमती प्रदेशपाखें ऐन जारी जूगुलिं थःपिंसं न्ह्याकाच्वनागु आन्दोलनया छगू चरण पार जुल, आः थ्व धुंकाः थुगु ऐनयात कार्यान्वयन याना वनेगु मेगु आन्दोलनया श्रृंखला शुरु जुइगु खँ नं वय्कलं कनादिल ।

उगु हे ज्याझ्वलय् जनकवि दुर्गालाल श्रेष्ठयात प्रधानमन्त्री प्रचण्डपाखें दोसल्लां न्ययेकाः सम्मान यायेगु ज्या नं जूगु खः । ज्याझ्वलय् न्ववासें जनकवि श्रेष्ठं थःपिंसं न्हापा यानागु आन्दोलनया फल थौं खाये खनाच्वन, आः ल्यं दनिगु जीवन नं थ्वहे आन्दोलनया लागिं खर्च याना वनेगु जुइ धयादिल । ज्याझ्वलय् बागमती प्रदेशया सांसद बहादुर सिंह लामा आदिपिंसं नं सम्बोधन यानादीगु खः ।

बसन्तपुलिइ सभा जुइ न्ह्यः छगू तःजिगु सांस्कृतिक ¥यालीपाखें देय् चाःहिलेगु ज्या नं जूगु खः । नेवाः व तामाङ समुदायया आपालं भाषिक कार्यकर्ता, बुद्धिजीवीपिंसं ब्वति काःगु उगु ¥यालीइ तामाङ समुदायं थःपिनि परम्परागत बाजं डम्फु थाना वःगु खःसा नेवाःतय् थीथी खलः पुचःतय्सं धिमे व नाय्खिं थाना वःगु खः । नेवाःतय्सं बाजं लिसें धुन्या नं चाःहिकाः वःगु खः । अथे हे तामाङ समुदायं नं आपालं ल्याखय् झाँक्री वसः पुना वःपिंसं झाँक्री बाजं व ज्वलं समेत ज्वनाः ¥यालीइ ब्वति काःगु खः । अथे हे ¥यालीइ नेपाल प्रज्ञा प्रतिष्ठानया प्राज्ञ लिसें कर्मचारी व कलाकारत नं प्रतिष्ठानया ब्यानर सहित ब्वति काः वःगु खः ।

बसन्तपुलिइ जूगु सभाय् संघीय सरकारया संस्कृतिमन्त्री हितबहादुर तामाङ लिसें बागमती प्रदेशया प्रमुख यादवचन्द्र शर्मा, बागमती प्रदेशसभाका सभामुख भुवनप्रकाश पाठक लिसें मन्त्रीगण, सांसदपिनि नं उपस्थिति दुगु खः । सभाय् नेवाः व तामाङ भासं म्ये हालेगु लिसें सांस्कृतिक प्याखं नं न्ह्यब्वःगु खः ।

नेपालभाषा टाइम्स

च्वमिया मेमेगु

• वतु त्वालय् दन्त शिविर
• पासा पुचः गुथि लन्दनया न्हूधाः
• ज्यापु समाजया निर्वतमान नायः तीर्थलालया अबु मंत
• ‘मौसम पूर्वानुमानयात गम्भीर रुपं मकाःगुलिं यक्व क्षति जूगु खः’ – वरिष्ठ माैसमविद् मणिरत्न शाक्य
• नखःचखःया दिं कायेत झीगु संस्कृतिया मौलिक परम्परा म्हसीकेमाल