स्मार्ट सहरी प्रविधिइ न्हापांगु चरणय् १४२ सुझाव छनोट

येँ – येँ महानगरपालिकां येँया विद्यमान सहरी समस्यायात प्रविधिया माध्यमं न्हूगु सोचपाखें समाधान मालेगु निंतिं ‘स्मार्ट सहरी प्रविधि प्रतिस्पर्धा’या निंतिं माग याःगु सुझावय् न्हापांगु चरणय् १४२ गू सुझाव छनोटय् लाःगु दु । येँ मनपां वंगु मंसिर २६ गतेनिसें सुझाव संकलन यायेगु शुरु याःगु खः ।

करिब लछिया ई बियाः सुझाव संकलन यायेगु झ्वलय् थ्व अवधिइ मुक्कं ४५२ गू सुझाव दुहां वःगु खःसा उकिमध्ये नं न्हापांगु चरणय् १४२ सुझाव छनोटय् लाःगु येँ मनपां जानकारी बिउगु दु । येँ मनपां विशेष यानाः समुदाय व वातावरण, सहरी पूर्वाधार विकास, सामुदायिक सेवा व सार्वजनिक प्रशासन व व्यवस्थापन यानाः प्यंगू क्षेत्रयात मुख्य विषय दयेकाः प्रतिस्पर्धाया निंतिं सुझाव संकलन याःगु खः ।

येँ मनपा सहरी योजना आयोगया सदस्य सचिव सरोज बस्नेतं बियादीगु जानकारीकथं थीथी चरणय् यानाः वइगु खुला तक थ्व प्रतिस्पर्धा न्ह्याइ । थ्व झ्वलय् वंगु पुस ३० गते न्हापांगु चरणय् सुझाव दर्ता यायेत ई बियातःगु खः ।

स्मार्ट सहरी प्रविधि प्रतिस्पर्धापाखें दुहां वःगु सोच व सुझावपाखें येँ देय्या समस्या पहिचान यायेगु व अज्याःगु समस्याया समाधान प्रविधिमैत्रीपाखें उपाय पत्ता लगे यायेगु येँ मनपां न्ह्यथंगु दु । प्रविधि, ज्ञान, सीपया माध्यमं महानगरया समग्र क्षेत्रया परिवर्तनया निंतिं प्रविधि मैत्री आधार तयार यायेगु मुख्य उद्देश्य जूगु येँ मनपां न्ह्यथंगु दु ।

सदस्य सचिव बस्नेतया कथं येँ देय्या समस्या पहिचान यानाः उकियात समाधान यायेगु, न्हूगु व प्रविधिमैत्री उपाय मालेगु झ्वलय् येँ मनपां ‘स्मार्ट सहरी प्रविधि प्रतिस्पर्धा–२०७५’ शुरु याःगु जानकारी बियादिल । प्रतिस्पर्धाय् दुहां वःगु मध्ये उत्कृष्ट सोच व सुझावयात न्यागू लाख तका पुरस्कारया नं व्यवस्था यानातःगु दु । अथे हे प्रतिस्पर्धाया निंतिं बियातःगु थीथी प्यंगू विषययात विजेतायात नं प्रतिसमूह २ गू लाख व उपविजेतायात छगू लाख बीगु व्यवस्था यानातःगु दु ।

 

सम्बन्धित बुखँ

LEAVE YOUR COMMENTS