मुग्लिङया लँय् राडार तइगु

येँ – मुग्लिंङ–नारायणगढ सतक खण्डय् यातायात दुर्घटना अप्वयेवं आः ट्राफिक प्रहरी राडार प्रणाली जडान यानाः दुर्घटना म्हो यायेगु योजना हःगु दु । सवारी साधन चले याइपिंसं तीव्र गतिं यातायात चले याइगुलिं यानाः दुर्घटना अप्वया वनाच्वंगु धासें स्थानीय ट्राफिक कार्यालयं राडार जडान यायेगु तयारी यानाच्वंगु खः ।

तीव्र गतिं सवारी साधन चले याना वइपिंत नियन्त्रण यायेगु निंतिं थज्याःगु प्रणाली हयेमाःगु खँ ट्राफिक प्रमुख वेदप्रसाद गौतमं कनादीगु दु । राडारया ग्वाहालि गुलि स्पीडं यातायात ब्वाँय् वनाच्वंगु खः धइगु खँ सीकाः स्पीड कन्ट्रोल यायेगु निंतिं ट्राफिक प्रहरीयात जानकारी याकेगु खँ धाःगु दु । गुकिं सतकय् च्वनाच्वंम्ह ट्राफिकं स्पीड वनाच्वंगु गाडीयात लँय् तुं पनाः कारबाही नं यायेफइगु खँ धाःगु दु ।

ट्राफिक प्रहरी थौंकन्हय् मुग्लिङ जुयाः चले जुइगु गाडीया गति नियन्त्रण यायेगु कथं अभियान नं न्ह्याकाच्वंगु दु । चालकया लापर्वाहीया कारणं अप्वः धइथें दुर्घटना जूगु धासें गति नियन्त्रण निंतिं थीथी उपाय नालाच्वंगु दु । उगु थासय् अप्वः धइथें दुर्घटना चालकया लापर्वाहीया कारणं यानाः हे जुयाच्वंगु प्रहरीया धापू दु ।