युनेस्कोया प्रतिनिधिमण्डल ख्वपय्

ख्वप – ख्वप नगरपालिकाया मेयर सुनिल प्रजापतिं युनेस्कोया प्रतिनिधिपिं डा. गमीनी बीजीसुरिया, क्याथरिन फोर्बस व नपिना सिंह श्रेष्ठ नापं पुरातत्व विभागया प्रतिनिधि मण्डलयात वंगु बिहीवाः ख्वप नगरपालिकाय् लसकुस यानादिल ।

उगु इलय् मेयर प्रजापतिं ख्वप नपां सरसफाईलय् ध्यान बियाच्वनागु खँ न्ह्यथनादिसें ख्वपयात सांस्कृतिक सम्पदा संरक्षित नगरकथं विकास यायेत मौलिक शैलीया छेँत निर्माणय् प्रोत्साहन यानाच्वनागु खँ कनादिल । वय्कलं मौलिक शैलीया छेँ दनीपिंत मोहडाय् माःगु अप्पा, झ्याःयात सिं नापं आँय्पाय् नगरपालिकां ३५ प्रतिशत अनुदान बिया वयाच्वनागु जानकारी बियादिल ।

युनेस्कोया डा. गमीनीं ख्वप नपां यानाच्वंगु सम्पदा संरक्षण प्रति प्रशंसा यानादिसें उपभोक्ता समिति मार्फत जुयाच्वंगु पुनःनिर्माणया बारे नं जानकारी बियादिल । ख्वप नगरपालिकाया उपप्रमुख रजनी जोशीं निर्माणाधीन सिंह ध्वाखा बारे प्रतिवेदन न्ह्यब्वयादीगु खःसा प्रतिनिधिमण्डलं ख्वप लाय्कू लागाया स्थलगत अबलोकन नं याःगु खः ।