बञ्चरेडाँडाय् न्हापांगु सेल दयेके क्वचाल

येँ – दीर्घकालीन फोहोर व्यवस्थापन यायेगु थाय् बञ्चरे– डाँडाय् न्हापांगु सेल दयेकेगु ज्या क्वचाःगु दु । शहरी विकास मन्त्रालयं आइतवाः उगु सेल दयेकेगु ज्या क्वचाःगु खँ धाःगु दु । मन्त्रालयं शहरी विकास तथा भवन निर्माण विभागयात उगु जानकारी याकुसें येँया फोहोर व्यवस्थापन याये फइगु निर्देशन बिउगु दु ।

मन्त्रालयं उगु सेल दयेके क्वचाःगु व मेगु ज्याय् थःपिनिगु जिम्मेवारी मदुगु जानकारी मन्त्रालयया प्रवक्ता विष्णुप्रसाद शर्मां बियादीगु दु ।
येँ मनपा लिसे समन्वय यानाः फोहोर व्यवस्थापन यायेगु सम्बन्धय् तत्काल निर्णय यायेत मन्त्रालयं विभागयात निर्देशन बीधुंकूगुलिं छुं न्हिं लिपा हे येँ मनपा लिसे स्वनिगःया झिंच्यागू स्थानीय तहया फोहोर बञ्चरे डाँडाय् थ्यंके फइगु खँ धाःगु दु । तत्काल फोहोर व्यवस्थापन यायेगु थाय् दयेकेगु ज्या क्वचाःसां नं निगूगु सेल दयेकेगु ज्या व मेगु ल्यंगु ज्या जुयाच्वंगु खँ मन्त्रालयं धाःगु दु ।

मेखे येँ मनपाया वातावरण विभाग प्रमुख हरिकुमार श्रेष्ठं थःत मन्त्रालय व विभाग गुगुं नं थासं बञ्चरेडाँडाय् फोहोर व्यवस्थापन याये फइगु औपचारिक जानकारी मवःगु खँ धयादीगु दु ।

शहरी विकास तथा भवन निर्माण विभागया महानिर्देशक नवराज प्याकुरेलं छुं न्हिं दुने हे येँ मनपा व विभाग दथुइ सहलह यानाः बञ्चरेडाँडाय् गबलेनिसें फोहोर यंकेगु धकाः ई क्वःछीगु खँ कनादीगु दु । वय्कलं फोहोर व्यवस्थापनया निंतिं येँ मनपां विभागयात औपचारिक पौ मच्वःगु खँ नं कनादीगु दु ।

सम्बन्धित बुखँ

LEAVE YOUR COMMENTS