दिपया विकल्प छु ?

येँ (नेपालभाषा टाइम्स) लिपा च्वं वःपिं आप्रवासीतय् विरोधया कारणं सी उइगु ज्याय् समस्या जुया वयाच्वंगु चाबही गंगाहिति दिपया विकल्प तयार जुल कि अन सी उइके मबीगु धकाः जूगु सहमतियात सम्पदा अभियन्तातय्सं विरोध याःगु दु ।

परम्परांनिसें सी उइगु थेंज्याःगु संस्कार जुयाच्वंगु थाय्या विकल्प धइगु दइ मखु धासें अभियन्तातय्सं ‘विकल्प’ सम्बन्धी अवधारणाया विरोध याःगु खः । वंगु वालय् हानं सी उइगु ज्याय् अन लिपा छेँ दनाः च्वं वःपिं आप्रवासीतय्सं विरोध यायेवं येँ मनपाय् थुकिया बारे सहलह जूगु खः । उगु मुँज्याय् मनपा नगर प्रहरी प्रमुख राजु पाण्डें दिपया विकल्प तयार मजूतले अन सी उइके बीमाः धासें आवंलि थःपिंसं सी उइगु ज्याय् पंगः थं वये मखु धकाः बचं बियादीगु खः ।

मनपाया थ्व धापू सकारात्मक खःसां दिपया विकल्प कथं मेथाय् सी उइके छ्वयेगु ज्या धाःसा स्वीकार्य मजुइगु खँ अभियन्तातय्सं धाःगु दु । उगु थासय् बस्ती सिबें न्ह्यः हे दिप दुगु जूगुलिं बरु बस्ती हे मेथाय् तये यंकेमाःगु खँ धाःगु दु ।

मनपाय् जूगु बैठकय् सहभागी जुयादीम्ह स्थानीय– वासी परमानन्द शाक्यं धाःसा थःपिंसं विकल्प धकाः दिप हे मेथाय् सारे यायेगु खँ धयागु मदु धयादीगु दु । ‘नेपालभाषा टाइम्स’ लिसे खँ ल्हासें वय्कलं धयादिल, ‘जिमिसं विकल्पया रुपय् यदि दिपं यक्व कुँ पिहां वइगु खःसा उकियात म्हो यायेगु, सरसफाइ यायेगु ज्या जक धयागु खः । दिप ला मेथाय् दयेके फइगु खँ हे मदु ।’

मनपाया बैठकं याःगु सहमतियात उगु बस्तीया आप्रवासीतय्सं अस्वीकार यासें हस्ताक्षर तकं मयासे वंगु खः । आः हानं सी उइगु ज्याय् उमिसं पंगः थं वल धाःसा नगर प्रहरीया ग्वाहालि कायेगु लँपु थःपिंत खुले जूगु खँ नं शाक्यं कनादिल ।