‘र’ प्रमुखया रहस्यमय भ्रमण शीर्षस्थ नेतातय् नापलात तर विवरण गोप्य

येँ – नेपाः दुने चीन व अमेरिकी स्वार्थया कारणं अनावश्यक द्वन्द्व सिर्जना जुइगु अवस्था पिहां वयाच्वंगु इलय् लाक्क भारतीय गुप्तचर संस्था ‘र’ या प्रमुख सामन्थ कुमार गोयलं आकाझाकां नेपाःया भ्रमण याःगु दुसा थ्व भ्रमणं नेपाः दुने हानं छु गज्याःगु राजनीतिक परिवर्तन वयेत्यंगु खः धइगु अनुमान याना हःगु दु ।

वंगु छुं न्हि न्ह्यवंनिसें नेपाः ‘र’ प्रमुख गोयल नेपाःया शीर्षस्थ नेतातय्त नापलानाः म्हिगः लिहां वनेधुंकूगु दु । तर वय्कःया भ्रमण बारे धाःसा सरकारं छुं नं कथंया जानकारी बियाच्वंगु मदु । थुकिं यानाः भ्रमण रहस्यमय जूगु खँ सूत्रं धाःगु दु ।

तर वय्कःया भ्रमणयात नेपाः सरकारं ‘समाचार बीम्वाःगु’ घटनाया रुपय् काःगु दुसां नेपाःस्थित भारतीय दूतावासया श्रोततय्सं हे थुकिया समाचार पित बियाच्वंगु खँ सूत्रं धाःगु दु । गोयल ‘र’ या प्रमुख जुइधुंकाः न्हापांखुसी थथे नेपाःया भ्रमण यानादीगु खः ।

गोयलं नेपाः च्वनाजःछि प्रधान–मन्त्री केपी ओली व सत्तारुढ दल नेकपाया मेम्ह अध्यक्ष पुष्पकमल दाहालयात वय्कःपिनि छेँय् हे वनाः नापलानादीगु खः । शुरुइ वय्कःयात नापलायेत प्रम ओलीं अनिच्छा क्यना च्वंगु खःसां लिपा आइतवाः बहनी नाप लायेत ई बियादीगु खः । वालुवाटारं थ्व भेटया बारे नं छुं समाचार धाःसा बिउगु मदु ।

प्रमुख प्रतिपक्षी नेता शेरबहादुर देउवां धाःसा भारतीय दूतावासय् हे वनाः गोयलयात नापलानादीगु खँ धाःगु दु । तर वय्कलं शीर्षस्थ नेतातय्त नाप लानाः याःगु खँल्हाबल्हाया विवरण धाःसा छुं नं पिहां वयाच्वंगु मदुनि । गोयलं नेपाः च्वना जःछि मेपिं नेतातय्त नं नापलाःगु खँ सूत्रं धाःगु दु ।

थःगु भ्रमण बारे यक्वस्यां चिउताः मतयेका धकाः गोयलया पुचः पशुपति नाथया दर्शन यानाः लिहां वंगु खँ नं धाःगु दु । गोयलयात पाकिस्तान विरुद्ध भारतं दयेकीगु छुं नं योजनाया प्रमुख कथं कायेगु याः । पुलांम्ह ‘र’ प्रमुख अनिल कुमार धस्मानां अवकाश कायेवं प्रधानमन्त्री नरेन्द्र मोदीं गोयलयात ‘र’ या न्हूम्ह प्रमुख दयेकूगु खः ।

सम्बन्धित बुखँ

LEAVE YOUR COMMENTS