चुनावया भिडय् कोरोना खतरा
येँ (नेपालभाषा टाइम्स)÷मंसिर ४ गते जुइगु निर्वाचनया इलय् भिडभाड जुयाः कोरोना संक्रमण तच्वया वने फुगु खँय् स्वास्थ्य मन्त्रालय सचेत जूगु दु । स्वास्थ्य मन्त्रालयं निर्वाचनया प्रचार प्रसार यायेगु झ्वलय् कोरोना न्यना वनीगु सम्भावना दु धासें कोभिड प्रोटोकल पालना यायेत इनाप याःगु दु । भीडभागय् जनस्वास्थ्यया मापदण्ड पालना मजुल धाःसा न्हूगु भेरियन्ट न्यना वनेफइगु खँ धासें मन्त्रालयया सहायक प्रवक्ता डा. समिरकुमार अधिकारीं चुनावया इलय् उच्च सतर्कता नालेत नं इनाप यानादीगु दु ।
कोभिडया न्हूगु भेरियन्टपाखें बचे जुइगु नितिं जनस्वास्थ्यया फुक्कं मापदण्ड पालना यानाः निर्वाचन प्रचार प्रसार यायेत नं मन्त्रालयं इनाप याःगु खः । सहायक प्रवक्ता अधिकारीं जारी याःगु विज्ञप्तिइ धयातःगु दु, ‘चुनाव प्रचारया झ्वलय् यक्व मनूत छथासं मुनीबलय् सामान्य अवस्थाय् नं जनस्वास्थ्यया ल्याखं जोखिमपूर्ण हे दु । अझ कोरोना संक्रमण अझ नं कायम हे दुुगुलिं भीडभाड जु्इबलय् न्हूगु भेरियन्टया संक्रमण जुइगु जोखिम दु । सम्भावित जोखिमयात ध्यानय् तयाः झीसं माक्स्क छ्यलेमाः ।’
मन्त्रालयं कोरोना खोप मकाःपिं मनूतय्त अज्याःगु भीडभाडय् मवनेत नं सचेत याःगु दु । नेपालय् आः तक कोरोना विरुद्धया खोप २ करोड ३३ लाख स्वयां अप्वः मनूतय्सं कायेधुंकूगु जानकारी नं सहायक प्रवक्ता अधिकारीं बियादीगु दु । उकथं हे खोप मकाःपिं सुं दनिसा छेँया लिकसं च्वंगु स्वास्थ्य संस्थाय् वनाः खोप कायेत नं मन्त्रालयं इनाप याःगु दु । चुनावया इलय् जुइगु भिडभाडं कोरोना बाहेक मेमेगु ल्वय् नं न्यना
वनेफु धासें मन्त्रालयं अज्याःगु खँय् नं सतर्क जुइत इनाप याःगु दु ।
मन्त्रालयं नेपालय् कोरोना संक्रमित जूपिनि ल्याः कम जुया वंसां संक्रमण जुइगु क्रम धाःसा अझ नं जारी दनिगु जूगुलिं भिडभाडं थुकियात अझ तच्वयेका यंके फुगु खँय् नं सचेत याःगु दु । थौंकन्हय् चुनाव प्रचारय् वइपिं नेता कार्यकर्तातय्सं ¥याली, सभा याइबलय् म्हुतुइ मास्क धाःसा म्हो हे जक मनूतय्सं तया वःगु खनेदु । भारतय् नं कोरोनाया इलय् हे जूगु चुनाव लिपा संक्रमण झन् तच्वया वंगु खः । वंगु छुं ई न्ह्यवंनिसें चीन लिसें अमेरिका व युरोपया देशय् कोरोना संक्रमितया ल्याः हानं थहां वनाच्वंगु दु ।
LEAVE YOUR COMMENTS