नवदुर्गा द्यःगंछियात सिजःया त्यप

ख्वप- थनया नांजाःगु नवदुर्गा द्यःयात झिंनिगः सिजःया त्यप छाःगु दु । नवदुर्गा देवगणया वसः सुरक्षित यानातयेगु निंतिं झिंनिम्ह द्यंगंछियात छगः छगः त्यप छाःगु खः । ख्वप नगरपालिका वडा नं. ५ छेँ जुयाः थौंकन्हय् वडा नं. ८ स्थित लिबालिबिइ च्वनाच्वंम्ह नारायणप्रसाद खाइतुं नवदुर्गा देवगणयात उगु सिजःया त्यप छानादीगु खः । नवदुर्गा देवगणया न्या लाकेगु जात्राया इलय् प्याखं क्यनेत आवश्यक थीथी तिसाज्वलं, वसः नापं मेमेगु हलंज्वलं सुरक्षित रुपं तयेगु निंतिं उगु त्यप छायेगु ज्या जूगु खः ।

थ्व स्वयां न्ह्यः द्यःगंछियात छानातःगु मल्लकालीन त्यप ज्या ख्यलय् मवयेक तसकं ज्यले धुंकूगु व गुलिं बांमलाक स्यने नं धुंकूगुलिं देवगणया मागकथं हे त्यप छाःगु खः । थः धर्म संस्कृतिप्रति तसकं आस्थावान जूगु व द्यःयाथाय् वनागु इलय् देवगणया पुलांगु त्यप नं तसकं जीर्ण अवस्थाय् थ्यने धुंकूगु खनागुलिं करुणा व धर्मप्रतिया आस्थाया कारणं थम्हं न्हूगु सिजःया त्यपया व्यवस्था यानागु खाइतुं कनादिल ।

प्यला तक मदिक्क थीथी थासय् वनाः त्यप दयेकेगु ज्या पूवंकाः देवगणयात उगु त्यप छाःगु खः । खाइतुं विधिवत रुपं हे द्यः ब्वयाः उगु त्यप छानादीगु खः । खाइतुं नवदुर्गा देवगणयात छानादीगु प्रत्येक त्यपय् देवगणया प्रतिककथं उम्ह हे द्यःया मूर्ति कियातःगु दु ।
नवदुर्गा देवगणय् ब्रम्हायणी, माहेश्वरी, कौमारि, भद्रकाली, वाराही, इन्द्रायणी, महाकाली, महालक्ष्मी, भैरवनाथ, गणेश, सिम्बाः, धुम्बाः दु । थुपिं झिंनिम्हं द्यःयात म्हतिं छगः छगः सिजःया त्यप छाःगु खः ।

सम्बन्धित बुखँ

LEAVE YOUR COMMENTS