परिषद्या झिंन्याक्वःगु दँमुँज्या

यल – नेपालभाषाया ख्यलय् पुलांगु साहित्यिक संस्था नेपालभाषा परिषद्या झिंन्याक्वःगु दँमुँज्या वंगु कौलागा चतुर्दशि, विहीवाः कुन्हु थनया कोपुण्डोलय् च्वंगु सातोआकी भवनय् जुल । परिषद्या नायः प्रा. सुवर्ण शाक्यया सभापतित्वय् जुल । परिषद्या सदस्य सचिव ध्रुव मधिकःमिं वार्षिक प्रगति विवरण न्ह्याब्वयादीगु दँमुँज्याय् दांभरिं मंगला कारंजितं आर्थिक प्रतिवेदन न्ह्यब्वयादीगु खः ।

नुगःखँ प्वंकेगु झ्वलय् दांभरिं कारंजितं ७० दँ पुलांगु इतिहास कुबियाच्वंगु संस्थाय् थौंया इलय् ७० म्ह हे जक जः दुजलय् सीमित जुया च्वंगुलिं भाषा साहित्यया विकासया निंतिं धिसिलाक्क पलाः न्ह्याके फुपिं न्हूपिं जः तनेमाःगु खँय् बः बियादिल । अथे हे तुलसी साय्मिं मनू मदयेधुंकाः विचाः हायेकेगु प्रवृत्तिया अन्त्य यानाः म्वानाच्वंबलय् हे इमिगु विचाःसंचाः यायेगुपाखें ध्यान बीमाः धयादिल ।

सभापतिया थासं परिषद्या नायः प्रा. शाक्यं दुनें क्वातु मजुइकं पिनें जक प्रचारवासी यानाः शक्ति संचय जुइ फइमखु धासें दँय्दसं सांस्कृतिक अन्यौलता ब्वलनाच्वंगु खँय् आः नेवाःतय्सं नं थःगु हे बिस्कं कथंया तिथि पौ (पात्र) पिथनाः नेवाः एकताया दसु न्ह्यब्वयेमाःगु हथाय् जूगु खँ कनादिल ।

ज्याझ्वलय् साहित्यकार डा. पुष्पराज राजकर्णिकार, विमलप्रभा वज्राचार्य, राज साय्मि, लगायतं थःथःगु नुगःखँ प्वंकादिसें परिषद्यात न्ह्याकेत सुझाव नं बियादीगु खः ।

नेपालभाषा टाइम्स

च्वमिया मेमेगु

• थुकथं न्ह्यात बोडेया म्ये प्वाः खनीगु जात्रा
• बिस्काःया झ्वलय् थिमिइ ‘सुथसिया याः’ न्यायेकल
• छायादेवीया जग्गा पुखू प्रमाणित
• पाहाँचःह्रे क्वचाल
• ताेखाय् बिस्काःया निंतिं यःसिं थन