गुथि विधेयक विधिवत् लित काल
आन्दोलनकारीपाखें सतर्कतापूर्वक ‘लसकुस’
येँ – राष्ट्रिय सभाया म्हिगः च्वंगु बैठकं गुथि विधेयक २०७५ लित कायेगु प्रस्ताव सर्वसम्मतं स्वीकृत याःगु दु । भूमि व्यवस्था, सहकारी तथा गरिबी निवारण मन्त्री पद्माकुमारी अर्यालं विधेयक लित कायेगु उगु प्रस्ताव तःगु खः । राष्ट्रिय सभाया अध्यक्ष गणेशप्रसाद तिमिल्सिनां उगु गुथि विधेयक २०७५ सर्वसम्मतं लित कयागु घोषणा यानादीगु खः ।
गुथि विधेयक लित कायेगु उगु निर्णययात विधेयक विरुद्ध आन्दोलन याना वयाच्वंगु संघर्ष समितिं धाःसा सतर्कतापूर्वक ‘लसकुस’ याःगु दु । येँया फिब्व ख्यलय् (माइतीघर मण्डलाय्) तःजिगु प्रदर्शनया आयोजक गुथि विधेयक प्रतिरोध संयक्त कार्यक्रमपाखें विधेयक लित कायेगु थ्व ज्यापाखें थःपिनि गम्भीर ध्यानाकर्षण जूगु खँ धाःगु दु ।
उकिया संयोजक डा. महेशमान श्रेष्ठं म्हिगः छगू वक्तव्य जारी यासें आः न्हूगु विधेयक मस्यौदा याइबलय् सरोकारवालात लिसे परामर्श कायेमाःगु, नेवाःतय् गुथितय्त स्वायत्तताया अधिकार बीमाःगु, आदिवासीतय् प्रथाजन्य परम्परा सम्बन्धी राष्ट्रिय अन्तर्राष्ट्रिय सन्धि सम्झौता नापं २०६६ सालया कुमारी जात्राया इलय् जूगु आन्दोलनं तयार याःगु प्रतिवेदनयात मूल आधार दयेकेमाःगु खँ न्ह्यथंगु दु ।
लिसें वक्तव्यय् न्हूगु विधेयक मस्यौदा यायेगु ज्याय् सरकारलिसे संवाद व परामर्श यायेत थःपिं खुल्ला दुगु खँ नं न्ह्यथनातःगु दु । सरकारं न्हूगु विधेयक तर्जुमा यानाः संसदपाखें पारित मयाःतले थःपिनि खबरदारी आन्दोलन जारी हे जुयाच्वनीगु खँ नं वक्तव्यय् स्पष्ट यानातःगु दु ।
उकथं हे नेवाः देय् दबूपाखें नं नायः नरेश ताम्राकारं म्हिगःहे छगू वक्तव्य जारी यासें राष्ट्रिय सभापाखें विधेयक विधिवत् रुपं लित काःगु ज्यायात ‘स्वागतयोग्य’ पलाः धकाः लसकुस याःगु दु । थ्वहे झ्वलय् नेवाः न्ह्यलवा लिसें समाजवादी पार्टीया सहअध्यक्ष राजेन्द्र श्रेष्ठं थुकियात आंशिक विजय धासें पूर्ण विजयया निंतिं विधेयक खारेज जुइमाःगु खँ कनादीगु दु ।
वय्कलं म्हिगः ‘नेपालभाषा टाइम्स’ लिसें खँ ल्हासें विधेयक लित कायेवं झीगु माग पूवंगु मखु धासें गुथिया स्वामित्व सम्बन्धित गुथियात हे लः ल्हायेमाःगु खँ नं कनादीगु दु ।
LEAVE YOUR COMMENTS