ने. सं. ११४६ अनलागा दुतिया -

मरुसतःयात हानं सिँ समस्या

येँ – मरुसतः पुनर्निर्माणया लागिं माःगु सिँ हयेगु ज्याय् हानं अवरोध पिहां वःगु खँ सीदुगु दु । अथे खःसां आः उकियात समाधान यायेगु लँपु धाःसा लुइधुंकूगु खँ नं धाःगु दु । मरुसतः पुनर्निर्माणया लागिं माःगु सिँ २ नम्बर प्रदेशय् लाःगु जंगलपाखें हयेमाःगु खः । तर अनया वन मन्त्रीं जंगलया सिमा पाले बी मखु धकाः पंगः थनेवं समस्या पिहां वःगु खःसां काष्ठमण्डप पुनर्निर्माण समितिया नायः लिसें प्रदेश ३ या सांसद राजेश शाक्यया विशेष पहलं सिँ हयेगु ज्या जूगु खः । अबले गुलि मात्राया सिँ हयेगु खँ जूगु खः, उलि वयेधुंकूगु जुयाः आः मेगु सिँ बी मखु धाःगुलिं हानं समस्या पिहां वःगु खँ अध्यक्ष शाक्यं कनादिल ।

थ्व समस्या हल यायेत आः पश्चिम नेपालं सिँ हयेगु तयारी जुयाच्वंगु खँ नं वय्कलं कनादिल । मरुसतः दयेकेगु लागिं आः ११ हजार क्युफिट ति सिँ मालीगु व उलि सिँ पश्चिमया बर्दियापाखें वइगु जानकारी नं वय्कलं ‘नेपालभाषा टाइम्स’ यात बियादिल ।

सिँया सिँ जक तयाः दयेकातःगु जुयाः मरुसतःयात खस नेपाली भासं काष्ठमण्डप धाइ । उकिं थ्व सतःया लागिं सिँ महत्वपूर्ण सामग्री खः । थौंकन्हय् मरुसतलय् प्रयोग जूगु सिँ भारतया रक्सौलंनिसें नेपाःया अमलेखगञ्ज तक पेट्रोलया पाइप लाइन तयेगु लागिं पाःगु सिमापाखें वःगु खः । निजगढय् विमानस्थल दयेकल धाःसा अन पालीगु सिमा नं मरुसतलय् प्रयोग यायेगु खँ जूगु खः, तर उगु विमानस्थल निर्माणया खँ हे विवादय् लाःगुलिं अनया सिँ हयेगु खँ नं अलपत्रय् लाःगु खः ।

सार्वजनिक सुनुवाई ः

मरुसतः पुनर्निर्माणय् आः तक जुयाच्वंगु प्रगति बारे सहलह यायेत म्हिगः पुनर्निर्माण समितिया बैठक च्वंगु खः । बैठकं मरुसतःया आः तक जुयाच्वंगु ज्याया बारे सार्वजनिक जानकारी बीगु ताः तयाः थ्वहे वइगु कात्तिक सार्वजनिक सुनुवाई यायेगु निर्णय जूगु जानकारी नं अध्यक्ष शाक्यं बियादिल । वकुुन्हु न्हिनय् ३ बजे मरुसतःया पिने हे थ्व सुनुवाई जुइ धासें उकी ब्वति कयातदीत नं वय्कलं इनाप यानादीगु दु ।

थप बजेट माग ः

मरुसतः दयेकेगु लागिं येँ महानगरपालिकापाखें माःगु बजेट उपलब्ध याना वयाच्वंगु खः । मनपां आः तक ५ करोड ५० लाख तका दां समितियात बीधुंकूगु दु । थ्व दां खर्च जुजुं वनाच्वंगुलिं आः मनपायात थप बजेट माग यायेगु निर्णय जूगु खँ नं शाक्यं कनादिल ।

न्हूम्ह कोषाध्यक्ष नियुक्त ः
बैठकं समितिया न्हूम्ह कोषाध्यक्ष पदय् हितकर ताम्राकारयात नियुक्त याःगु दु । पुलांम्ह कोषाध्यक्ष अशोकरत्न वज्राचार्य मदुगुलिं उगु पद प्वनाच्वंगु खः ।