
ख्वप – भक्तपुर अस्पतालय् नं सघन उपचार सेवा (आईसीयु) संचालन जुइगु जूगु दु । वइगु स्वलाया दुने थुगु सेवा शुरु जुइगु जानकारी बिउगु खः । स्वनिगःया हे पुलांगु अस्पताल मध्ये छगू थुगु अस्पताल ११३ दँ न्ह्यः संचालन जूगु खःसा आईसीयु सेवा शुरु यायेगु निंतिं आपालं कुतः जूसां सफल जुइ मफयाच्वंगु खः । जिल्ला समन्वय समितिं अस्पतालया हे सभाहलय् याःगु छगू सहलहया इलय् प्रतिनिधिसभाया सदस्य महेश बस्नेतं स्वलाया दुने अस्पतालय् आईसीयु शुरु यायेगु व उकिया निंतिं आवश्यककथंया तयारी न्ह्याकेत अस्पताल व्यवस्थापनयात निर्देशन बियादिल ।
अस्पतालय् आईसीयु सेवा संचालनया निंतिं थः स्वास्थ्यमन्त्री, सरकार गन तक वनेमाःगु खः, अन तक वनेत तयार दु धासें वय्कलं विशेष उपचार सेवा आइकेयर युनिट तत्कल शुरु यायेमाःगु व सघन उपचार सेवा स्वलाया दुने शुरु यायेमाःगु खँय् बः बियादिल । ख्वपया प्रमुख जिल्ला अधिकारी द्रोण पोखरेलं अस्पतालं सघन उपचार सेवाया निंतिं आवश्यक सामग्री हया तयेधुंकूगुलिं आः सेवा संचालन यायेगु अवसर त्वःफिके मजिउ धासे याकनं संचालन यायेमाः व उकिया निंतिं माःथाय् माःकथं ग्वाहालि कायेगु स्वयेमाः धयादिल । चाँगुनारायण नगरपालिकाया प्रमुख सोम मिश्रं सेवा अप्वयेकेगु खँय् अस्पताल सकारात्मक जुइमाः धासें संचालक समिति दयेकाः वनेमाःगु सुझाव बियादिल ।
LEAVE YOUR COMMENTS