‘आः विद्रोही पुचः विप्लव जक ल्यं दनि’

येँ – मुलुक हे टुक्रा यायेमाः धइगु तकया माग ज्वनाः आन्दोलन यानाच्वंम्ह सीके राउत तकं मूलधारय् वयेधुंकाः आः राज्य विरुद्ध विद्रोह यायेगु धकाः सक्रिय जुयाच्वंगु पुचःत मध्ये नेक्रविक्रम चन्द ‘विप्लव’ या छगू पार्टी हे जक ल्यं दइगु सम्भावना खने दया वःगु दु ।
छुं ई न्ह्यः तिनि सरकारं थीथी विद्रोही पुचःतलिसे वार्ता यायेगु धकाः छगू वार्ता टोली गठन याःगु खः ।

उगु वार्ता टोलीं थीथी पुचःतलिसे याःगु वार्ताया झ्वलय् फुक्क धइथें विद्रोही पुचःतय्सं थः कार्यकर्तायात सरकारं तयातःगु मुद्दा लित काल धाःसा उपिं नं मूलधारय् वये धकाः बचं बिउगु खः । उगु वार्ता पुचलं वहे सुझाव सरकारयात बिसें उमि कार्यकर्ता विरुद्ध तयातःगु मुद्दा लित कायेत आग्रह नं याःगु खः ।

तर वार्ता पुचलं बिउगु सुझावयात कार्यान्वयन यायेगु ज्या धाःसा ढिला जुयाच्वंगु दु । यदि सरकारं थःपिंसं बियागु सुझावयात कार्यान्वयन यानाः उमिगु विरुद्ध मुद्दा लित काल धाःसा फुक्क हे पुचःत मुलधारय् वइगु व अन्तिमय् विप्लव याकःचा हे जक ल्यं दइगु खँ धाःगु दु ।
सरकारं सांसद सोमप्रसाद पाण्डेया नेतृत्वय् उगु वार्ता टोली गठन याःगु खःसा आः उगु टोलीया म्याद नं क्वचायेधुंकूगु दु ।

वार्ता पुचलं बिउगु सुझाव कथं उकथं लित कायेमाःगु मुद्दात करिब द्वःछिगू ति दु । उकी मध्ये ४०० गू सामान्य मुद्दा खःसा ६०० गू धाःसा भचा जटिल दु । थुलि मुद्दा लित कया बिल धाःस देशय् विप्लव बाहेक मेपिं विद्रोही पुचः धइपिं हे मदइगु दावी नं वार्ता पुचलं याःगु दु । विप्लव पुचलं वार्ता टोलीलिसे वार्ता यायेत नं अस्वीकार याःगु खः ।