देय्न्यंकं थीथी थासय् च्वापु वा गात

येँ – म्हीग बहनीनिसें मदिक्क वा वयाः देय्न्यंकंया हिमाली लागाय् च्वापु वा गायाः अनया जनजीवन प्रभावित जूगु दु । मदिक्क वयाच्वंगु वां स्वनिगःया थीथी डाँडाय् नं च्वापु वा गाःगु दुसा म्हिगः येँया चन्द्रागिरीइ च्वापुइ म्हितेत म्वःम्वः मनूत वंगु खः ।

मदिक्क वा वयाच्वंगुलिं उच्च पहाडी व हिमाली भेगय् वंगु मंगवाः बहनिनिसें च्वापु वा गाःगु खः । पश्चिमी वायुया प्रभावं च्वापु वा गायेवं उच्च पहाडी व हिमाली भेगया जनजीवन प्रभावित जूगु दु । च्वापु वा गायाः कर्णालीया मुगु, हुम्ला, जुम्ला व डोल्पा जिल्ला प्रभावित जूगु दु ।
हुम्लाया सिमिकोट बजारय् आपालं च्वापु वा गाःगुलिं स्थानीय जनता वयेवनेगु व वस्त झः वनेत तकं थाकूगु स्थानीयवासिन्दां धाःगु दु । तर च्वापु वा गायाः जनजीवन प्रभावित जूसां नं गुलिखे किसानत धाःसा

लय्ताःगु दु । च्वापु वा गायाः स्याउ, तछ्व, छ्व उत्पादन वृद्धि जुइगु धासें स्थानीयवासिन्दा लय्ताःगु खः । उकथं हे पर्यटकीय गन्तव्य मुगु जिल्लाया राराय् नं च्वापु वा गायेवं अन चाःहिउ वयाच्वंपिं आन्तरिक पर्यटक उत्साहित जूगु दु । च्वापु वा गायाः कर्णालीया सतक व हवाई सेवा प्रभावित जूगु दु ।

उकथं हे रसुवा जिल्लाय् नं म्हिगः सुथंनिसें च्वापु वा गाःगु दु । च्वापु वा गायाः जिल्लाया उत्तरी क्षेत्रय् गत्लाङ, लाङटाङ, क्याङजिन, तातोपानी, ठूलोस्याफ्रु आदि क्षेत्रय् छगू फिट स्वयां अप्वः च्वापु मुनाच्वंगु दु । च्वापु वा गायेवं स्थानीय वडाध्यक्षतय्सं छेँय् नं पिहां मवयेत व छुं नं समस्या दुसा प्रहरीयात जानकारी याकेत इनाप याःगु दु ।

थ्वहे झ्वलय् दार्चुला, बैतडी, खोटाङ, हेलम्बु आदि क्षेत्रय् नं च्वापु वा गायाच्वंगु दु । हेलम्बुइ प्यंगू फिट तक च्वापु मुनाच्वंगु दुसा छुं छुं थासय् लँ अवरुद्ध जुयाः सवारी साधन चले यायेत तकं थाकुयाच्वंगु सीदुगु दु ।

उकथं हे हेटौंडाया दामनय् नं च्वापु गायाः लँ अवरुद्ध जूगु दु । च्वापु गायेवं प्रहरी प्रशासनं लँ बन्द याःगु खः ।