ब्रिगेड ब्वाइजयात थ्रीस्टारया न्यागू गोल

येँ – शहीद स्मारक ए डिभिजन लिग अन्तर्गत आइतवाः जूगु कासाय् थ्रीस्टार क्लबं ब्रिगेड ब्वाइज क्लबयात ५–१ गोलं बुकूगु दु । थ्रीस्टारं कासाया गुंगू मिनेटय् रञ्जित धिमालया गोलया ग्वाहालिं अग्रता काःगु खः । ब्रिगेडया रन्दीप पौडेलं थ्रीस्थारया निराजन खडकायात डिबक्स दुने फल तयेवं थ्रीस्टारयात पेनाल्टि वःगु खः ।

न्हापांगु हाफय् पेनाल्टिपाखें छगू जक गोल याःसां निगूगु हाफय् थ्रीस्टारं प्यंगू गोल याःगु खः । कासाया ५१ औं मिनेटय् सुनिल बलं गोल यानाः थ्रीस्टारयात निगू गोलं अग्रता बिउगु खः । तर ७४ औं मिनेटय् बिग्रेड ब्वाइजया राजन तिवारीं गोल यानाः गोल अन्तर म्हो याःगु खःसां थ्वयां १० मिनेट लिपा हे रन्जन विष्टं थ्रीस्टारया निंतिं मेगु गोल यात । थ्वयां ५ मिनेट लिपा निराजन खड्का थप छगू गोल यातसा इन्जुरी इलय् विक्रम लामां नं छगू गोल यासें थ्रीस्टारयात ५–१ गोलं विजय चूलाकाबिल ।

कासा लिपा थ्रीस्टारया प्रशिक्षक मेघराज केसीं थः कासामितय्सं बांलाःगु प्रदर्शन याःगु धासें लसता प्वंकुसें थ्व लयया निरन्तरता बीगु खँ धयादीगु दु ।

आइतवाः हे जूगु मेगु कासाय् नेपाल पुलिस क्लब व मछिन्द्र क्लबं बराबरी म्हितूगु दु । यलया सातदोबाटोय् च्वंगु एन्फा कम्प्लेक्सया मैदान जूगु कासाय् निगुलिं गोल याये मफयेवं कासा गोलरहित बराबरीइ क्वचाःगु खः। बांलाःगु प्रर्दशन याःसां नेपाल पुलिसं गोल याये मफुगु खः । मछिन्द्रं रक्षात्मक कासा म्हिताः बराबरी याःगु खः।
शहिद स्मारक लिग अन्तर्गत थ्व सिजनय् नेपाल पुलिस क्लबं न्हापांगु कासाय् जावाखेल युथ क्लबयात १–० गोलं बुकेधुंकूगु दु । मेखे मछिन्द्रं धाःसा थःगु न्हापांगु कासा नं च्यासल युथ क्लबलिसे गोलरहित बराबरी म्हितूगु खः।

सम्बन्धित बुखँ

LEAVE YOUR COMMENTS