ऐतिहासिक एकदिवसीय मान्यताया दछि

नेपाली क्रिकेटं गबलें नं ल्वःमंके मफइगु मिति खः मार्च १५ अर्थात नेपालं एकदिवशीय मान्यता काःगु दिं । थनिं दछि (थौं नं प्यन्हु) न्ह्यः नेपालं अन्तर्राष्ट्रिय क्रिकेट काउन्सिल (आइसीसी)पाखें प्यदँया निंतिं ‘वान डे’ मान्यता प्राप्त याःगु खः । अन्तराष्ट्रिय क्रिकेटय् पलाः न्ह्याकूगु २२ दँ लिपा नेपाली क्रिकेटं उगु ऐतिहासिक सफलता प्राप्त याःगु खः ।

उगु सफलता नेपाली क्रिकेट व कासा ख्यलं न्ह्याबलें नं लुमंका तयेगु याइ । उगु सफलतां सकल नेपाःमियात लसता बिउगु खः । उकिं नेपाली कासाख्याःया ह्यमिपिंसं मार्च १५या दिंयात न्ह्याबलें नं लुमंका तयेगु याइ । एकदिवसीय मान्यता प्राप्त याःगु थ्व दछिया अवधि दुने नेपालं एकदिवशीय व टि–२० क्रिकेट श्रृंखलातकं त्याकेधुंकूगु दु ।

थनिं लछि न्ह्यः नेपालं युएईविरुद्ध छगू एकदिवसीय व टि–२० श्रृंखा त्याकाः एकदिवसीय मान्यताया सार्थकता पूवंकेधुंकूगु दु । थगुने मार्च महिनाय् प्यदँया निंतिं नेपालं न्हापांखुसी एकदिवसीय मान्यता कायेधुंकाः नेपालं अगष्टय् नेदरल्याण्ड नापं न्हापांगु एकदिवसीय श्रृंखला म्हितूगु खः ।

नेपालं नेदरल्याण्डनाप न्हापांगु एकदिवसीय श्रृंखला म्हितूगु खः । निगू कासाया उगु ऐतिहासिक श्रृंखला नेपालं १–१या बराबरीइ क्वचायेकल । ऐतिहासिक श्रृंखला म्हितूगु खुला लिपा नेपालं युएइलिसें लछिति न्ह्यः टि–२० व एकदिवसीय श्रृंखला म्हितूगु खः । उगु निगुलिं श्रृंखला नेपालं थःगु पक्षय् यायेत सफल जुल ।

निगू कासाया उगु ऐतिहासिक श्रृंखला नेपालं १–१या बराबरीइ क्वचायेकल । ऐतिहासिक श्रृंखला म्हितूगु झण्डै खुला लिपा वयाः नेपालं युएइलिसें लछि न्ह्यः जक टि–२० व एकदिवसीय श्रृंखला म्हितूगु खः । उगु निगुलिं श्रृंखला नेपालं थःगु पक्षय् यायेत सफल जुल ।

डिभिजन –५पाखें यात्रा न्ह्याकूगु नेपालं थ्व स्वयां न्ह्यः सन् २०१४ य् विश्वकप छनोट म्हिताः एकदिवसीय मान्यता कायेगु निंतिं कुतः याःगु खः, तर न्यूजिल्याण्डय् जूगु उगु छनोटय् कमजोर प्रदर्शन यायेवं नेपाः गुंगूगु थासय् सीमित जुयाः डिभिजन–३ य् घटुवा जूगु खः । उगु इलय् हङकङ, युएई, स्कटल्याण्ड, पपुवा न्यूगिनीं एकदिवसीय राष्ट्रया मान्यता प्राप्त याःगु खः ।

नेपालं एकदिवसीय मान्यता प्राप्त याःगु दिंयात लुमंकेबलय् विश्वकप छनोटतक थ्यंकेत महत्वपूर्ण भूमिका म्हितूम्ह करण केसीयात लुमंकेगु याः । डिभिजन–२ अन्तर्गत क्यानाडा विरुद्धया कासाय् एक विकेटया रोमाञ्चक व सनसनीपूर्ण विजयय् करण नायक जूगु खः ।

# मान्यता ल्यंकेत चुनौति
प्यदँया निंतिं प्राप्त एकदिवसीय मान्यता ल्यंका तयेगु निंतिं धाःसा नेपाःयात तसकं चुनौति दु । निलम्बित नेपाल क्रिकेट संघ (क्यान) या अध्यक्ष चतुरबहादुर चन्द क्यान निलम्बन, पूर्वाधार निर्माणय् जुयाच्वंगु ढिलासुस्ती लगायतया कारणं नेपालं एकदिवसीय मान्यता ल्यंकेत थाकुगु खँ धयादी ।

वय्कलं धयादिल, ‘घरेलु क्रिकेटया व्यवस्थापननिसें संरचनातक दक्वं अन्योलग्रस्त अवस्थाय् दु, झीत एकदिवसीय मान्यता ल्यंका तयेत तसकं थाकु ।’ एकदिवसीय मान्यता ल्यंकातयेत तत्काल प्रदेशस्तरीय कासाया संरचना निर्माण यायेगु ज्या न्ह्याकेमाःगु व न्हू पुस्ताया कासामि उत्पादनय् बः बीगु आवश्यक जूगु वय्कःया सुझाव दु ।

नेपाली राष्ट्रिय क्रिकेट टीमया प्रशिक्षक जगत टमाटां घरेलु क्रिकेटया संरचना, भौतिक पूर्वाधार, कासामिपिनिगु सुसाःकुसाः लगायत प्रोफेसनल सेटअप यायेमाःगु हाथ्या नेपाःयाके दुगु धयादिल । वय्कलं धयादिल, ‘बांलाःगु संरचना दयेकाः न्ह्याः वनेगु खः धइगु जूसा एकदिवसीया मान्यता प्यदँया निंतिं जक मखु, न्ह्याबलेंया निंतिं कायम याना तये फइ ।’

नेपाली क्रिकेट टीमया कप्तान पारस खड्कां क्रिकेटया पदाधिकारी व सरोकारवालां जिम्मेवारी पूवंके फुसा जक एकदिवसीय मान्यता ल्यंका तये फइगु तर्क तयादिल । ‘सरकार व थःपिंत क्रिकेटया स्टेक होल्डरं थःगु जिम्मेवारी पूमवंकूगुलिं नेपालं प्राप्त याःगु सफलता छखे लाइगु खतरा दु । क्रिकेटया विकासया निंतिं सक्षम क्रिकेट बोर्ड व घरेलु संरचनायात बल्लाके फत धाःसा एकदिवसीय मान्यता ल्यंका तये फइ’ खड्काया धापू दु ।

 

सम्बन्धित बुखँ

LEAVE YOUR COMMENTS