टोकियो ओलम्पिकय् चीन शीर्ष थासय् कायम

एजेन्सी- टोकियो ओलम्पिकय् चीन, अमेरिका व जापानया दथुइ शीर्ष थाय्या निंतिं धेंधेंबल्लाः जुयाच्वंगु दु । आइतवाः सनिलय् तकया दुने चीन २३ स्वर्ण, १४ रजत व १३ कास्य यानाः मुक्क ५० पदक त्याकाः शीर्ष थासय् दु ।

निगूगु थासय् दुगु अमेरिकां २० स्वर्ण, २० रजत व १४ कास्य यानाः ५४ पदक त्याकूगु दुसा स्वंगूगु थासय् दुगु जापानं १७ स्वर्ण, न्यागू रजत व च्यागू कास्य त्याकेधुंकूगु दु । ओलम्पिकया प्यंगूगु थासय् अस्ट्रेलिया दु । अस्ट्रेलियां १४ स्वर्ण, स्वंगू रजत व १४ कास्य त्याकूगु दु ।

आइतवाः ओलम्पिकया पौडीइ जूगु कासाय् अमेरिकाया सेलेब डे«सलं न्यागूगु स्वर्ण त्याकल । आइतवाः जूगु कासाय् प्यंगू गुणा १०० मिटर रिलेय् सेलेब ड्रेसलं विश्व कीर्तिमान दयेकाः स्वर्ण त्याकूगु खः ।

अथे हे अस्ट्रेलियाया पौडी कासामि एम्मा म्याकेओनं प्यंगू स्वर्ण नाप यानाः न्हय्गू पदक त्याकाः सोभियत युनियनया जिमन्यास कासामि मारिया गारोखोभ्कां तयातःगु छगू हे ओलम्पिकय् दकलय् अप्वः पदक त्याकूम्ह मिसाम्ह कासामिया र्कीतिमानया बराबरी याःगु दु । अथे हे कतारं इतिहासय् हे न्हापांखुसी स्वर्ण त्याकल ।

कतारया फरेस एल बाख मिजंपाखेंया भारात्तोलनय् स्वर्ण त्याकूगु खः । एथलेटिक्सया १०० मिटरया कासाय् जमैकां छगू हे कासाय् स्वर्ण, रजत व कास्य त्याकल । कासाय् जमैकाया थम्पसन हेरां स्वर्ण त्याकूगु खः ।