ने. सं. ११४४ कौलाथ्व पारू - नःलास्वनेगु

नेवाः देय् दबूया विधान अधिवेशनया सवाल

नेपालमण्डल लागाया आदिवासी नेवाः समुदायया मंकाःगु राष्ट्रिय संगठन नेवाः देय् दबू खः । लिपांगु इलय् वया येँ महानगर, किपू नगरनिसें थीथी कथंया पालिका स्तरीय नेवाः देय् दबूया संरचना निर्माण याःगुलिं नेवाः देय् दबूया बारे नेवाः समाजय् न्हापालिपासिबें नं अप्वः चर्चा जुयाच्वंगु दु ।

नेवाः देय् दबूपाखें स्वनिगलय् थीथी ज्याझ्वः याना वयाच्वंगु नापनापं नेवाःतय्गु सवालयात कया भूमिका म्हितेगु ज्या यानाच्वंगु अवस्था दु । थ्व हे झ्वलय् नेवाः देय् दबूया विधान अधिवेशन वइगु पुष १६ गते नेपालगञ्जय् जूवनाच्वंगु दु । नेवाः देय् दबूया विधान अधिवेशन धयागु मात्र विधान अधिवेशन मखु । थ्व विधान अधिवेशनं नेवाःतय्गु संगठनया बारे निर्णय याइगु नाप नापं उकिं आः नेवाः देय् दबू गज्याःगु लँपु ज्वनाः वनी धयागु बारे नं स्पष्ट याइगु छगू महत्वपूर्णगु ज्या खः ।

विधान धइगु सम्वन्धित संगठनयात गुगु कथं न्ह्याकेगु नापनापं नेवाः मुद्दायात गुगु कथं ज्वना वनेगु धयागु बारे स्पष्ट यायेगु ज्या याइ । विधान धयागु सम्वन्धित संगठनया नितिं लँपु क्यनेगु, संस्थाया आज्जुनिसें संस्थाया ज्या अले गुगु नं इलय् समस्या वल धाःसा समाधनया लँपु मालेगु ज्या नं उकिं हे याइ । संस्थायात जीवन्तता बिइत विधानयात ई कथं हिलायंकेगु अर्थात संशोधन याना वनेमाः । ई कथं हिला यंके मफुत धाःसा संस्थायात जीवन्त यायेत थाकुइगु खँय् सुयां निगू मत दइमखु ।

नेपालगञ्जय् विधान अधिवेशन
नेपाल संवत १११५ स स्थापना जूगु नेवाःतय्गु मंकाःगु राष्ट्रिय संगठन नेवाः देय् दबूया इतिहासय् निक्वः तक विधान अधिवेशन जुइ धुंकूगु दु । दकलय् न्हापां पोखराय् विधान अधिवेशन जूगु खःसा अनं लिपा नारायणघाटय् जूगु खः । थुगुसी स्वक्वःगु विधान अधिवेशन जूवनाच्वंगु दु । थ्व हे वइगु पुष १६ गते नेपालगञ्जय् जुइगु विधान अधिवेशनय् नेवाः देय् दबूया देय्न्यंकंया प्रतिनिधितय्सं ब्वति काइ । विधान अधिवेशनय् विधानया बारे ब्यापक सहलह जुइ अले आवंलि नेवाः देय् दबूयात गुगु कथं न्ह्याकेगु धयागु बारे स्पष्ट मार्ग निर्देशन बिइगु ज्या जुइ ।

न्हूगु नेतृत्व ल्ययेगु निंतिं संगठनया महाधिवेशन जुइगु खःसा नीतिगत खँया सवालय् तसकं महत्वपूर्णगु ज्या धयागु विधान अधिवेशन हे खः । विधान अधिवेशन धयागु संस्थाया छगू महत्वपूर्णगु ज्या खः । थौं देय् संघीय संरचनाय् वने धुंकूगु नापं राजनीतिक रुपं नं यक्व कथंया हिउपाः वये धुंकूगु अवस्थाय् विधान अधिवेशन जूवनाच्वंगु धयागु महत्वपूर्णगु ज्या खः । नेवाः देय् दबूयात संघीय संरचना कथं कार्यान्वन याना वनेगु निंतिं छगू महत्वपूर्णगु ज्या यायेगु धयागु विधान संशोधन यायेगु खः । विधान संशोधन यायेगु ज्या हे विधान अधिवेशनं याइगु खः ।

विधान संशोधनया मू मुद्दाः
नेवाः ट्रष्टी सदस्य १ लाख तक बिइपिंत महाधिवेशनय् तप्यंक ब्वति कायेदइगु तर उम्मेदवारी बिइ मदइगु प्रस्ताव यंकीगु जूगु दु । थुगु कथंया व्यवस्था नेवाः देय् दबूया विधानय् न्हापांखुसी यायेत्यंगु दु ।

अथे हे नेवाः देय् दबूया आजिवन सदस्य दयेकेगु नं प्रस्ताव तःगु दु । आजिवन सदस्य प्रस्तावित बुँदाय् १० हजार तका दां तयाः सुं नं नेवाः आजिवन सदस्य जुइफइगु व्यवस्था यानातःगु दु । थुगु विषययात कया नं ब्यापक रुपं सहलह ब्याका छगू निष्कर्षय् थ्यंकी धाःगु दु ।
नेवाःतय्गु गुलि नं खलः पुचःत दु अज्याःगु खलः पुचःयात नेवाः देय् दबूपाखें संस्थागत सदस्यया रुपय् मान्यता बिइगु कथंया व्यवस्था यायेत्यंगु दु ।

देय् संघीय संरचनाय् वने धुंकूगु अवस्थाय् राज्य पुनरसंरचना कथं नेवाः देय् दबूया संरचना निर्माण यायेगु कथंया प्रस्ताव यायेगु धकाः सहलह ब्याका निष्कर्षय् थ्यंकेगु कथंया योजना नेवाः देय् दबूपाखें दयेकूगु दु ।

सम्बन्धन प्राप्त सदस्यया रुपय् थीथी देशय् वनाः च्वनाच्वंपिं नेवाःतय्सं दयेकूगु नेवाः संगठनयात मान्यता बिइगु कथंया व्यवस्था यायेगु प्रस्ताव हयेत्यंगु दु । विदेशय् नेवाः खलः पुचःयात मान्यता बिइगु कथंया प्रस्ताव धयागु नेवाः देय् दबूया विधानय् न्हूगु कथंया प्रस्ताव जूगु दु । थुगु कथंया विधान संशोधनं नेवाः देय् दबूयात अझ अप्वः चकंका यंकेगु नापं अझ अप्वः ब्यापक याना यंकेगु ज्या जुइ धयागु खँय् सुयां निगू मत दइमखु ।

थ्व हे दथुइ नेवाः देय् दबूया बारे नेवाः समाजय् छगू न्हूगु कथंया बहस नं सुरु जूगु दु । विधान अधिवेशनय् हे सहलह ब्याकेमाः धकाः वयाच्वंगु खँ धइगु नेवाः देय् दबूया नेतृत्वय् च्वनीपिंसं थःगु कार्यकाल तक छुं नं पार्टीया ध्वाँय् ज्वने दइमखु धयागु व्यवस्था यायेमाः धयाच्वंगु दु । थुगु खँ नेवाः देय् दबू दुने संस्थागत रुपं वयाच्वंगु मखुसां नं नेवाः देय् दबूया बारे चासो तइपिं नापं नेवाः आन्दोलन व नेवाः मुद्दायात सरोकार क्यनीपिंसं धायेगु याना वयाच्वंगु दु ।

छुं पार्टीया नेता नेवाः देय् दबूया नेतृत्वय् वल धाःसा उकिं यानाः देय् दबू हे उगु पार्टीया थें जुइगु अले नेवाःतय्त तःधंगु लिच्वः लायेफु । छगू पार्टीया नेता नेतृत्वय् वल धाःसा मेगु पार्टीं नेवाः देय् दबूयात न्ह्याकेगुलिइ पंगः थनेफु । मेगु पार्टीया नेवाः कार्यकर्तातय्सं हाकनं नेवाः देय् दबूयात ज्यामछिंगु कथंया ज्या यायेफइगु अवस्था वयेफु । पार्टीया ध्वाँय् ज्वना जुइम्ह नेतृत्वय् दत धाःसा पार्टीया निर्देशन कथं जक न्ह्याः वनीगु अवस्थाय् नेवाः मुद्दायात कमजोर यायेगु खेल नं जुइफु । थुगु कथंया खँयात ध्यानय् तयाः आः विधान अधिवेशनपाखें नेवाः देय् दबूया विधानय् पार्टीया नेता वा कार्यकर्ता नेतृत्वय् वल धाःसां नं थःगु कार्यकालय् पार्टीया ध्वाँय् ज्वनेमखु अले नेवाःतय्गु मंकाःगु मुद्दा ज्वनाः नेवाः ध्वाँय् ज्वना वने धकाः धायेकेगु व सपथ नकेगु ज्या तकं यायेमाः धकाः बहस शुरु जूगु दु ।

नेवाः देय् दबूया थुगु कथंया विधान अधिवेशनय् संस्थागत रुपं वइगु विधान संशोधनया सवाल नाप नापं जनस्तरय् तकं बहस जुयाच्वंगु विधान संशोधनया बारे ब्यापक सहलह ब्याकेमाःगु आवश्यता दु । देय् दबूया नेतृत्वया सवालय् नेवाःतय्गु मुद्दा ज्वना वनेगु नापनापं दलिय कथंया किचः मलाइगु कथंया व्यवस्था यायेत जनस्तरपाखें वःगु सवालयात कया नं विधान संशोधन यायेमाःगु आवश्यकता दु । उकिया निंतिं विधान अधिवेशनय् सहभागी जुयादीपिंसं गम्भीर रुपं बिचाः यायेमाः । थुगु खँय् नेवाः देय् दबूया नेतृत्वं नं बिचाः यायेमाःगु आवश्यकता दु ।