भारतया स्वयां चिनियाँ लगानीकर्ता निदुगं
येँ – चालु आर्थिक दँया च्याला दुने भारतीय लगानीया तुलनाय् चिनिया लगानीकर्तात निदुगं धयाथें अप्वःगु खँ धाःगु दु । अर्थ मन्त्रालयं नेपालय् लगानीया निंतिं भारतीया तुलनाय् निदुगं चिनियाँ लगानीकर्तां स्वीकृति काःगु खँ धाःगु दु । थौंकन्हय् नेपालय् ९२ गू देशय् लगानी यानाच्वंगु दुसा थुकी भारतीय उद्योगतय् ल्याः न्हय्सलं अप्वःगु दुसा चिनियाँ उद्योगया ल्याः झिंनिसलं मल्याक थ्यंगु दु ।
तर लगानीया ल्याखं धाःसा अझ नं भारतीय लगानी हे यक्व दुगु खँ धाःगु दु । अर्थ मन्त्रालयं आइतवाः सार्वजनिक याःगु आर्थिक सर्वेक्षण २०७४÷७५ कथं निगू जःलाखःला देय् मध्ये चालु आर्थिक दँया च्यागू महिनाया दुने नेपालय् लगानी याइपिं भारतीयतय् तुलनाय् चिनियाँ निदुगं थ्यंगु खः ।
अथेहे थुगु दँय् थगुने स्वयां निदुगं अप्वः विदेशी लगानीया प्रतिबद्धता नं वःगु दु । तर विदेशी लगानीया निंतिं स्वीकृति काःगु उद्योग मध्ये लागतया आधारय् भारतया लगानीकर्ता ३५ प्रतिशत, चीनयापिनिगु २६ प्रतिशत व हंगकंगयापिनिगु ११ प्रतिशत ब्व दु ।लागतया ल्याखं भारत न्ह्यःने दुसां चिनिया लगानीकर्तात अप्वःगु बारे अर्थ मन्त्रालयया प्रवक्ता झक्कुप्रसाद आचार्यं बिबिसीलिसे खँ ल्हासें धाःगु दु, ‘लिपांगु इलय् वैदेशिक लगानीया लागि चिनियात थः हे बजाः चाःहिला जुयाच्वंगु दु ।
थन लगानीया सम्भावना यक्व दु । नेपाल भूगोलया कारणं नं नापसां लाःगु व लगानीया प्रतिफल नं यक्व खंगुलिं हे नेपाःयात ल्यःगु जुइमाः ।’निगुलिं देय्या लगानीकर्तातय्सं मुख्य यानाः जलविद्युत, सौर्य, ऊर्जा, शहरी फोहर व्यवस्थापन व मेमेगु पूर्वाधार निर्माणय् लगानी यायेत नुगः क्वसायेकाच्वंगु दु । नेपालय् स्वंगुलिं तहया निर्वाचन क्वचायेधुंकाः स्थिर सरकार वःगुलिं नं विदेशी लगानी अप्वःगु खँ अर्थमन्त्रालयया बिचाः दु ।
तर अर्थविद्तय् बिचाः धाःसा अथे मदु । अर्थ विद् मिना आचार्यया कथं थन वःगु चिनिया व भारतीइ लगानी धयागु थःम्ह चाहे जूगु इलय् नियन्त्रण यायेफइ कथं जक लगानी वःगु खः । थुकिं नेपाःया राजनीतिइ गुकथं प्रभाव लाइ धयागु स्वये ल्यं दनि । नेपालय् दुहां वःगु लगानीं सृजना याइगु रोजगारं नेपालीतय्त सुरक्षित याइगु व तालिम बीगु कथया मदुगु खँ अर्थविद् आचार्यया धापू दु ।
लगानी सम्भाव्यता अध्ययन यायेत परामर्शदाता आह्वान
येँ – लगानी बोर्डंं व्यवसायकि कृषि, शिक्षा व स्वास्थ्यय् तःधंगु लगानी दुतहयेगु तयारी याःगु दु । बोर्डं उकिया सम्भाव्यता अध्ययन यायेगु निंतिं स्वदेशी परामर्शदातयाके आशयपत्र माग याःगु दु । बोर्डं शिक्षा, स्वास्थ्य, खेलकुद क्षेत्रयात अझ अप्वः व्यवसायिक रुपं न्ह्यःने न्ह्याकेत थुकथं तयारी याःगु खः ।
अथेहे व्यवसायिक कृषि प्रणालीपाखे उत्पादन अप्वयेकेगु, पशुपालनयात व्यवसायीकरण यायेगु व ला प्रशोधन केन्द्र स्थापना यानाः स्वस्थकर ला निकासी यायेगु प्रक्रिया न्ह्यःने न्ह्याकूगु दु । बोर्डं सार्वजनिक निजी साझेदारी वा निजी क्षेत्रया जक लगानीइ थुगु आयोजना न्ह्यःने न्ह्याकेगु जानकारी बिउगु दु । लछिया दुने आशयपत्र पेश यायेत बोर्डं सूचना बिउगु दु ।
परामर्शदाता नियुक्ति लिपा सम्भाव्यता अध्ययन जुइसा उगु प्रतिवेदनया आधारय् सार्वजनिक निजी साझेदारीइ आयोजनाया ज्या न्ह्याइगु खँ धाःगु दु । थौंकन्हय् बोर्डं जलविद्युत, सिमेन्ट, फोहोर व्यवस्थापन, मेट्रो व मोनोरेल लगायत वृहत लगानीया आयोजना न्ह्याकाच्वंगु दु ।
LEAVE YOUR COMMENTS