बन्द यायेगु ख्याच्वः लिपा गुणस्तरया आवेदन
येँ – गुणस्तर मापदण्ड पूमवंकूपिं ग्यास उद्योग बन्द यायेगु सरकारया ख्याच्वः लिपा थीथी ग्यास उद्योगं नेपाल गुणस्तर चिंया प्रमाणपत्रया निंतिं
आवेदन बिउगु दु । लछि न्ह्यः सरकारं ग्यास उद्योगयात गुणस्तर चिं कायेत निर्देशन बिसें चिं मकाःगु उद्योगयात खारेज यायेगु ख्याच्वः बिउगु खः ।
गुणस्तर चिं मकाःपिंत ग्यास मबीत सरकारं आयल निगमयात पौ नं च्वयेधुंकूगु खः । गुणस्तर तथा नापतौल विभागया महानिर्देशक विश्वबाबु पुडासैनीया कथं गुणस्तर चिं मकाःपिं फुक्कं ग्यास उद्योगं आः गुणस्तर चिं कायेत निंतिं आवेदन बिउगु दु ।
आः तक प्यंगू ग्यास उद्योग नेपाल ग्यास, साइबाबा, मनोज व श्रीकृष्ण ग्यास उद्योगं जक गुणस्तर चिं कायेधुंकूगु दु । विभागया प्रवक्ता रोमी मानन्धरं गुणस्तर चिं मकाःपिं ५३ गू ग्यास उद्योगं एनएस चिंया निंतिं विभागय् भ्वँ पेश याःगु खँ धयादीगु दु । वय्कलं धयादीगु दु, ‘आः जिमिसं भ्वँया अध्ययन यानाच्वनागु दु, माल धाःसा थप भ्वँया निंतिं उद्योगयात इनाप यायेगु जुइ ।’ लिसें वय्कलं माःगु भ्वँ पेश मयाःगु उद्योगयात याकनं पेश यायेत पत्रचार यानागु खँ कनादिल ।
प्रवक्ता मानन्धरया कथं थीथी प्यंगू ग्यास उद्योग एनएस चिंया निंतिं योग्य खनेदुगु दु । उगु उद्योगं पेश याःगु भ्वँया आधारय् ‘फिल्ड भिजिट’ व माःगु अनुगमन लिपा जक एनएस चिं बीगु खँ विभागं धाःगु दु । विभागं ग्यास भरे याइगु सिलिन्डर, उद्योग व उद्योगया पूर्वाधार मापदण्ड स्वयाः जक गुणस्तर चिंया प्रमाणपत्र बी । विभागं वंगु दँया कार्तिक महिनाय् स्वलाया दुने अनिवार्य रुपं एनएस चिं कायेत धाःगु खः । तर दछि तक नं गुणस्तर चिं कायेत उद्योगतय्सं वास्ता मयायेवं विभागं कडा चेतावनी बिउगु खः ।
LEAVE YOUR COMMENTS