ने. सं. ११४६ बछलाथ्व सप्तमी -

वा वःगुलिं फोहोर काः मवल

येँ – वा वयाः नुवाकोटया सिसडोलय् गाडी यंके मफुगुलिं स्वनिलय् फोहोर संकलन बन्द जूगु दु । फोहोर वायेगु थासय् चलः वनाः गाडी यंके मफयेवं वंगु प्यन्हु न्ह्यवंनिसें राजधानी लगायत स्वनिगलय् फोहोर संकलन याये मफुगु खँ मनपाया वातावरण विभाग प्रमुख हरिकुमार श्रेष्ठं ‘नेपालभाषा टाइम्स’ यात कनादीगु दु ।

वा वयाः चलः वंगुलिं गाडी यंके मफुगु खँ कँसें वय्कलं छन्हु निन्हु वा दित धाःसा येँया फोहोर वायेत समस्या मजुइगु खँ कनादिल । सिसडोलय् ताः ई न्ह्यवंनिसें फोहोर वायेगु यानाच्वंगु खःसा अन फोहोरया पहाड हे बने जुयाः चलः वंगु खँ नं वय्कलं कनादिल ।

सिसडोलय् फोहोर वानाः जक समस्या समाधान मजुइगु जुयाः आः सरकारं सिसडोल स्वयां च्वय् बञ्चरेडाँडाय् फोहोर व्यवस्थापन यायेगु निंतिं ज्या न्ह्याकूगु दु । वइगु स्वदँया दुने बञ्चरेडाँडाय् फोहोर व्यवस्था याये फइगु खँ नं वय्कलं कनादिल । अन मेगु ५० दँ तकया लागिं फोहोर वाये फइगु व्यवस्था जुइ ।