ने. सं. ११४६ बछलागा तृतीया -

यँयाःयात अन्तर्राष्ट्रिय रुपय् प्रवद्र्धन यायेमाः

येँ(नेपालभाषा टाइम्स)- येँ महानगरपालिकाया उपप्रमुख सुनिता डंगोलं येँ देय्या तःजिगु व दकलय् तःधंगु नखः यँयाःयात राष्ट्रिय रुपय् अपनत्व व अन्तर्राष्ट्रियस्तय् प्रवद्र्धन यायेमाःगु खँ धयादीगु दु । यँयाःया मुख्य आकर्षण द्यः खः सालेगु ज्याय् म्ह्याय्मस्तय्त नं न्ह्यःने हयेगु ज्यां जात्रायात लैंगिक मैत्री याना यंकाच्वंगु वय्कःया धापू दु ।

येँ महानगर उपप्रमुख डंगोलं इन्द्रजात्रा व्यवस्थापन समितिपाखें ग्वसाः ग्वःगू ज्याझ्वलय् नवासें उगु खँ धयादीगु खः । समितिं यँयाःया दकलय् लिपांगु दिं नानिचा याः व्यवस्थापनया निंतिं ग्वसाः ग्वःगु सहलह ज्याझ्वलय् नवासें वय्कलं यँयाः जात्राया गरिमायात राष्ट्रिय रुपय् अपनत्वबोध याकेगु व अन्तर्राष्ट्रियस्तरय् प्रवद्र्धन याकेत येँ महानगरं नं थःगु थासं कुतः यानाच्वंगु दु धयादिल ।

उगु इलय् वय्कलं यँयाः जात्रा अवलोकनया निंतिं थुगुसी नं येँ महानगरलिसे भगिनी सम्बन्ध दुगु नगरपाखें व येँ थीथी पालिकापाखें प्रमुख व उपप्रमुखयात जात्रा अवलोकनया निंतिं ब्वनागु जानकारी बियादीगु दु । यँयाःयात अन्तर्राष्ट्रिय रुपय् प्रवद्र्धन यायेगु ल्याखं येँ महानगरलिसे अन्तर्राष्ट्रिय भगिनी सम्बन्ध दुगु १८ गू नगर व दक्षिण एशियाया न्हय्गू देय्या राजधानी सहरया प्रमुख व उपप्रमुखयात नं जात्रा अवलोकनया निंतिं ब्वनागु खँ वय्कलं कनादिल ।

वय्कलं धयादिल, ‘जात्रा संचालन, व्यवस्थापन, संरक्षण नापं प्रवद्र्धन यायेगु महानगरया नं दायित्व खः थुकियात पूवंकेत प्रतिवद्ध दु ।’
महानगरीय प्रहरी वृत्त जनसेवाया प्रमुख लिसें प्रहरी नायब उपरीक्षक शालिग्राम शर्मां शान्ति सुरक्षा आवश्यक विषय खः धासें उकिया निंतिं प्रहरीयात सकसिनं ग्वाहालि यायेमाः व सुरक्षाया मापदण्ड पालना यायेमाःगु खँय् बः बियादिल ।

यँयाःलिसे सम्बन्धित थीथी नीगुंगू खलःया प्रतिनिधित्व दुगु व्यवस्थापन समितिया नेतृत्व गौतमरत्न शाक्यं याना वयाच्वनादीगु दु । समितिया अध्यक्ष शाक्यं जात्रायात व्यवस्थित व भव्य रुपं सम्पन्न यायेत सकसिगुं ग्वाहालि आवश्यक जू धासें समितिइ प्रतिनिधित्व यानाच्वंगु दक्वं खलः, पुचःलिसे समन्वय यानाः जात्रा संचालन यायेगु कथं तयारी जुयाच्वंगु जानकारी बियादीगु दु ।

वंगु झिछदँ न्ह्यवनिसें नानीचा याःकुन्हु मिसातय्सं द्यः खः सालेगु याना वयाच्वंगु खःसा थुकिया संयोजन नानीहेरा महर्जनं याना वयाच्वनादीगु दु ।
यँयाः निंतिं यःसिं भोताहितिइ थ्यंके हये धुंकूगु दु । वइगु यंलाथ्व कायास्तमिकुन्हु नगर प्रवेश धकाः हनुमानध्वाखाय् थ्यंके हइ । वइगु बुधवाः यंलाथ्व द्वादशिकुन्हु सुथसिया ७ः१७ ताः इलय् यःसिं थनेवं यँयाः शुरु जुइ । नानीचा याः भदौ २९ गते लानाच्वंगु दुसा थ्व कुन्हु बहनि ७ः३३ ताः इलय् यःसिं क्वथइगु साइत दु ।