एसीसी प्रिमियर कपय् नेपाःया विजयी सुरुवात

येँ (नेपालभाषा टाइम्स)÷ एसीसी प्रिमियर कपय् नेपाःया विजयी सुरुवात जूगु दु । मंगलवाः मलेसियालिसे उलेज्या कासा म्हितूगु नेपालं ६ विकेटया न्ह्यथनेबहःगु विजय चूलाकूगु खः । नेपाःया विजयया निंतिं अलराउण्डर कुशल मल्ल व भीम सार्किं उत्कृष्ट ब्याटिङ याःगु खः ।

मलेसिया टस त्याकाः न्हापां ब्याटिङ यासें नेपाःयात २३६ रनया विजय लक्ष्य बिउगु खः । उगु लक्ष्य नेपालं ४ विकेटया क्षतिइ ३६.२ ओभरय् हे चूलाकूगु खः । थुकिया निंतिं मल्लं ४० बलय् न्यागू चौका व न्यागू छक्का सहित अविजित ७० रन दयेकलसा भीम सार्किं ९८ बलय् न्यागू चौका सहित ७१ रनया योगदान बिल ।

नेपाःया ओपनर आसिफ शेख १ रनय् हे आउट जूगु खःसा थ्व लिपा भीम सार्कि व कुशल भुर्तेलं ४८ रनया साझेदारी याःगु खः । भुर्तेलं थ्व झ्वलय् ३१ बलय् न्यागू चौका व निगू छक्का सहित ३८ रन दयेकूगु खः । थ्व लिपा वःम्ह रोहित पौडेलं ४३ बल म्हिताः न्यागू चौकासहित ४२ रनया योगदान याःगु खः ।

मलेसियां ५० ओभरय् ९ विकेटया क्षतिइ २३५ रन दयेकूगु खः । मलेसियाया निंतिं कप्तान अहमद फैजं ७६ रन, मोहम्मद आमिरं १७ रन, विरनदीप सिंहं ४६ रन, खिजर हायतं २२, सैयद अजिजं १३, विजय उन्नीं १२, सैजरुलं २१ रन दयेकूगु खः ।

नेपाःया निंतिं सोमपाल कामी व सन्दीप लामिछानें स्वंगू स्वंगू विकेट काःगु खः । कामीं ९ ओभरय् ४० रन खर्च यानाः स्वंगू विकेट काःगु खः । अथेहे सन्दीप लामिछानें १० ओभरय् १ मेडनसहित ४८ रन बियाः स्वंगू विकेट काल । ललितनारायण राजवंशीं १० ओभरय् ३४ रन खर्च यानाः निगू, गुलशन झां ४ ओभरय् १ मेडनसहित ३३ रन बियाः छगू विकेट काःगु खः ।

समूह एय् लाःगु नेपालं आः ओमान, कतार व साउदी अरेबियालिसे म्हिती । शुक्रवाः नेपालं ओमानलिसे प्रतिस्पर्धा याइ । थ्व धेंधेंबल्लाखय् न्हाप लाःगु टिमं एशिया कपय् म्हितेखनी ।

म्हिगः हे मुलपानीया मैदानय् जूगु न्हापांगु कासाय् हंगकंगं सिंगापुरयात ८ विकेटं बुकल । समूह बीइ हंगकंगलिसें युएई, कुवेत, सिंगापुर व बहराइन लाःगु दु ।

 

सम्बन्धित बुखँ

LEAVE YOUR COMMENTS