याकनं न्याय मजूगुली दाहालपाखें क्षमा याचना

येँ – सत्तारुढ नेपाल कम्युनिष्ट पार्टी (नेकपा) या अध्यक्ष पुष्पकमल दाहालं संक्रमणकालीन न्यायया विषययात क्वचायेकेगु ज्या लिबायेधुंकूगु खँ स्वीकार यासें थुकिया लागिं क्षमा याचना यानादीगु दु । राजनीतिक नेतृत्व व दलतय् कारणं हे थ्व ज्या ताःहाकः जुयावंगु धासें वय्कलं कमजोरी भिंकाः न्ह्याः वनेगु प्रतिवद्धता नं प्वंकादीगु दु ।

म्हिगः राष्ट्रिय मानव अधिकार आयोगं ग्वसाः ग्वःगु राजनीतिक नेतृत्व व पीडिततय् दथुइ जूगु अन्तरसंवाद ज्याझ्वलय् न्ववायेगु झ्वलय् वय्कलं उगु खँ धयादीगु खः । वय्कलं आयोगयात ग्वाहालि यायेगु स्वयां छम्हेस्यां मेम्हेसित दोष बीगु प्रवृत्तिं यानाः समस्या ब्वलंगु खँ नं धयादीगु दु ।

आः वयाः राजनीतिक दलत सदांया निंतिं समस्या समाधान जुइमाः धइगु निष्कर्षय् थ्यंकः वःगु धासें अध्यक्ष दाहालं आः बेपत्ता छानबिन आयोग व सत्य निरुपण आयोग दयेकेगु व पीडायात सम्बोधन यायेगु ज्या नापनापं यंकेमाःगु खँ नं धयादीगु दु । सरकारं आः तकं थ्व निगुलिं आयोग गठन याये फुगु मदुनि ।

उगु हे ज्याझ्वलय् न्ववायेगु झ्वलय् प्रमुख प्रतिपक्षी नेता लिसें नेपाली कांग्रेसया सभापति शेरबहादुर देउवां मेलमिलापं हे संक्रमणकालीन न्याययात क्वःछीमाःगु खँ धयादीगु दु । वय्कलं कानुन संशोधन यायेत व द्वन्द्वकालीन मुद्दायात क्वचायेकेत आः लिबाके मजिउगु खँ धयादीगु खः । सभापति देउवां शान्तिप्रक्रियात प्राथमिकताय् तयाः पीडितयात न्याय बीमाःगु खँ धासें मेलमिलापं हे समाधान मालेमाःगु खँ धयादीगु दु ।