अमेरिकाय् दाहालयात ज्वनेत उजुरी, तर ज्वनीगु सम्भावना मंत

येँ – जहान सीता दाहालया उपचार याकेत अमेरिका झाःम्ह नेकपाया अध्यक्ष पुष्पकमल दाहालयात अमेरिकाय् युद्ध अपराधया द्वपनय् ज्वनीगु जकं खः लाकि धकाः हुइनाभुइना पिहां वयाच्वंगु इलय् अमेरिकी सरकारं हे दाहालयात गनं नं केरकार याये मते धकाः ‘नो इन्भेष्टिगेशन नोटिश’ जारी याःगु दु । खास यानाः अमेरिकालिसे स्वापू स्यनाच्वंपिं विश्वया सुं नं नेता अमेरिका दुहां वल धाःसा उमित छुं कथंया समस्या मवयेमा धकाः अमेरिकी सरकारं थज्याःगु विशेष सर्कुलर जारी याइगु खः ।

दाहाल अमेरिका वइगु जुइवं अमेरिकाया केन्टुकी स्टेट युनिभर्सिटीइ ज्या याइम्ह छम्ह नेपाःमि डा. तिलक श्रेष्ठं दाहालयात ज्वनाः कारवाही यायेमाः धकाः उजुरी दर्ता याःगु खः । दाहालयात नेपालय् आतंककारी धकाः म्हसिउ धासें युद्ध अपराधीतय्त विश्वया न्ह्यागु देशय् नं ज्वनाः कारवाही याये जिउ धइगु जिकिर यासें डा. श्रेष्ठं बाल्टिमोरस्थित संघीय ब्यूरोय् उगु उजुरी दर्ता याःगु खः ।

थुखे दाहाल अमेरिका वनाच्वंगु हे पाः लाकाः नेपालय् नं डा. गोविन्द केसी लगायतया छगू पुचलं झिदँ ताःहाकःगु जनयुद्धया इलय् अपराध याःपिं मानव अधिकारविरोधीतय्त कारवाही यायेमाः धासें राष्ट्र संघ व मानव अधिकार आयोगयात ज्ञापनपौ लःल्हाःगु दु । डा. केसी लगायतया पुचलं लःल्हाःगु खुगू बुँदाया उगु ज्ञापनया छगू बुँदाय् ‘यदि पीडकयात थःगु हे देश दुने दण्डित याये मफुत धाःसा सरोकारवाला पक्षं विश्वव्यापी क्षेत्राधिकारया समेत उपयोग यायेमाः’ धकाः उल्लेख यानातःगु दु ।

आः अमेरिकी सरकारं हे दाहालयात अमेरिकाय् गनं नं केरकार मयायेगु नोटिश जारी याःगुलिं वय्कःयात अज्याःगु छुं कथंया कारवाही याइगु सम्भावना धाःसा मदया वंगु खँ धाःगु दु ।