पन्तिइ मकर मेला स्थगित

येँ – कोरोनाया स्वंगूगु लहर न्यना वनाच्वंगुलिं काभ्रेया पन्ति नगरपालिका–७ त्रिवेणीघाटय् जुइगु झिंनिदँया मकर मेला स्थगित जूगु दु । म्हिगः जिल्ला कोभिड व्यवस्थापन समिति (डीसीएमीसी) या बैठकं माघ महिना लछि न्ह्याइगु उगु मेला मयायेगु निर्णय याःगु खः ।

डीसीएमसीया संयोजक लिसें प्रमुख जिल्ला अधिकारी उद्धव केसीया अध्यक्षताय् च्वंगु बैठकं जिल्ला दुने गुगुं नं सार्वजनिक थासय् जुइगु भेला व महोत्सव मयायेगु निंतिं मेला आयोजक समितियात इनाप यायेगु निर्णय याःगु खः । सरकारं मेला व महोत्सव मयायेत व नीन्याम्ह स्वयां अप्वः ममुनेत इनाप यायेवं भीडभाड मयायेगु व स्वास्थ्य मापदण्डया पूर्ण पालना याकेगु व्यवस्था मिले यायेगु निर्णय याःगु दु ।

कोरोनाया संक्रमण न्हियान्हिथं हे अप्वया वनाच्वंगुलिं नागरिकया स्वास्थ्ययात ध्यानय् तयाः जिल्लां नं सजकता नालेमाःगु खनेदुगुलिं महोत्सवया ज्याझ्वः स्थगित यानागु खँ डीसीएमसीं धाःगु दु । महोत्सवया लागिं ताःई न्ह्यवंनिसें तयारी जुयाच्वंगु खः ।