राष्ट्रपतिपाखें निगूलिं अध्यादेश जारी

येँ – राष्ट्रपति विद्यादेवी भण्डारीं सोमवाः मन्त्रिपरिषदं प्रस्ताव याःगु निगूलिं अध्यादेश जारी यानादीगु दु । राजनीतिक दलसम्बन्धी निगूगु संशोधन अध्यादेश व संवैधानिक परिषद सम्बन्धी न्हापांगु संशोधन अध्यादेश राष्ट्रपति भण्डारीं जारी यानादीगु खः ।

साेमवाः प्रधानमन्त्री निवास बालुवाटारय् च्वंगु मन्त्रिपरिषदया मुँज्यां पार्टी विभाजन यायेत केन्द्रीय समिति व संसदीय दलया ४० प्रतिशत बहुमत दयेमाःगु कानूनी प्रावधानयात चीकाः निगू मध्ये छगूया जक बहुमत दःसा गाइगु व्यवस्था सहित अध्यादेश हयेगु निर्णय याःगु खः ।

अथेहे संवैधानिक परिषदया मुँज्याय् गणपूरक ल्याः न्याम्ह माःगु थासय् आः प्यम्ह जक दुसां गाःगु अध्यादेश नं मन्त्रिपरिषदं पारित याःगु खः ।

राष्ट्रपतिं जारी याःगु अध्यादेश संसद अधिवेशन सुरू जूगु खुइन्हुया दुने संसदया बहुमतं पारित जुइमाःगु संवैधानिक प्रावधान दु ।