शनिवाः लिम्बुया अन्त्येष्टि

येँ (नेपालभाषा टाइम्स)- कोशी प्रदेश नां तःगु विरोधय् जूगु प्रदर्शनया झ्वलय् मदुम्ह पद्म लिम्बु (लाजेहाङ) या अन्त्येष्टि कंस शनिवाः याइगु जूगु दु। कोशी प्रदेश नां तःगु विरोधय् वंगु चैत ५ गते विराटनगरय् जूगु प्रदर्शनय् प्रहरीया लाठीचार्जय् लानाः घाःपाः जूम्ह लिम्बु वंगु चैत १० गते वासः याकुयाकुं मदुगु खः । लिम्बु मदुगु २९ न्हु लिपा अन्त्येष्टि यायेत्यंगु खः ।

कन्हय् शवयात्रा लिपा कंस अन्त्येष्टि यायेगु खँ संघीय लोकतान्त्रिक राष्ट्रिय मञ्चं धाःगु दु। अन्त्येष्टि याये न्ह्यः सीम्हयात अन्तिम श्रद्धाञ्जली बीगु नितिं सुनसरीया धरान, इटहरी व विराटनगरय् तइगु जूगु दु।

प्रदेश नं. १ पुनः नामाकरण संघर्ष समितिं म्हिगः छगू मंकाः वक्तव्य पित बिसें लिम्बुया अन्तिम संस्कार सम्बन्धी ज्याझ्वः सार्वजनिक याःगु खः । ज्याझ्वः कथं धरानय् कन्हय् सुथये १० बजे श्रद्धाञ्जली सभा, ११ बजे इटहरी व १२ बजेविराटनगरय् श्रद्धांजलि सभा याइगु ज्याझ्वः दु। वयां लिपा बेलबारीस्थित लिम्बुया छेँय् यंकाः अनं तुं अन्तिम संस्कार याइगु ग्वसाः दु। लिम्बुयात सम्मानपूर्वक अन्त्येष्टि यायेगु निर्णय जूगु खँ धाःगु दु।

पहिचान पक्षधरया माग कथं सरकारं वंगु चैत २४ गते लिम्बुयात शहिद घोषणा यायेधुंकूगु दुसा वय्कःया छेँजःपिंत झिगू लाख तका राहत बीगु निर्णय नं याःगु दु। वय्कःया मृत्यु लिपा पूर्वय् पहिचानया आन्दोलन अझ तच्वः जुया वंगु दु।

सम्बन्धित बुखँ

LEAVE YOUR COMMENTS